Сыл саҕаланыаҕыттан 100-тэн тахса байыастары уонна кинилэр дьиэ кэргэттэрин үлэҕэ киллэрдилэр

Саха сиригэр сыл саҕаланыаҕыттан байыаннай дьайыы 32 кыттыылааҕа уонна байыаннай сулууспалаахтар 85 дьиэ кэргэттэрин чилиэнэ үлэҕэ киирдилэр. Бу туһунан от ыйын 1 күнүгэр ыытыллыбыт брифиҥҥэ өрөспүүбүлүкэтээҕи Дьарыктаах буолуу киинин дириэктэрин солбуйааччыта Игорь Соловьев иһитиннэрдэ.

«Машинист, массыына өрөмүөнүн слесара, токарь, мэдиссиинэ сиэстэрэтэ, оҕо уһуйаанын иитээччитэ, администратор, атыы-эргиэн менеджера курдук идэлэр ордук ирдэнэллэр. Атын идэҕэ бэлэмниир бырагыраама чэрчитинэн быйыл байыаннай дьайыы 5 бэтэрээнэ уонна байыаннай сулууспалаахтар 5 дьиэ кэргэттэрин чилиэнэ оптуобус суоппара, социальнай үлэһит, иистэнньэҥ, пуобар, газоэлектросварщик идэлэригэр уонна урбаанньыт буолууга куурустары аастылар», – диэтэ Игорь Соловьев.

Кини иһитиннэрбитинэн, билиҥҥи туругунан дьарыктаах буолуу сулууспатыгар учуокка 58 байыас уонна кинилэр 64 дьиэ кэргэттэрин чилиэнэ турар. Өрөспүүбүлүкэ каадырын кииннэрэ гражданнары иһитиннэрэр уонна сүбэлиир-амалыыр тэрээһиннэри көхтөөхтүк ыыталлар, өрөспүүбүлүкэ тэрилтэлэригэр үлэҕэ киирэргэ көмөлөһөллөр, диэн Саха Өрөспүүбүлүкэтин Ил Дарханын уонна Бырабыыталыстыбатын пресс-сулууспата иһитиннэрэр.