Сыл саҕаланыаҕыттан 3000-тан тахса бэйдиэ сылдьар ыты туттулар

Бэтэринээрийэ управлениетын дааннайынан, сыл саҕаланыаҕыттан өрөспүүбүлүкэҕэ 3164 хаһаайына суох кыыл тутулунна. Өссө 137-тэ — приюттарга уонна быстах кэмҥэ тутар пууннарга олохтоохтортон киирбиттэр.

Ордук элбэх хаһаайына суох ыты, чуолаан 1608-һу, Дьокуускай уулуссаларыттан туттулар. Нерюнгри улууһугар 431 кыыл, Өлүөхүмэҕэ — 192, Хаҥаласка — 129, Ньурбаҕа — 109 тутулунна. Бүлүү, Нам уонна Алдан улуустарыгар арыый аҕыйах — сөптөөҕүнэн 92, 90 уонна 86. Чурапчыга — 61, Эдьигээҥҥэ — 60, Аллайыахаҕа — 58, Орто Халымаҕа — 55, Ленскэйгэ — 52, Сунтаарга — 51, оттон атын улуустарга — 50-тан аҕыйах.

Ону таһынан, сыл саҕаланыаҕыттан СӨ Административнай кэһиилэр туһунан кодексатын  5.4 ыстатыйатынан дьиэ кыылын тутуу быраабылатын кэһии иһин 614 боротокуол оҥоһулунна. Уопсайа 701 500 солкуобай суумалаах ыстарааптар анаммыттар. Иитиллэр кыыллар дьон доруобуйатыгар хоромньуну оҥорбуттарын иһин РФ Административнай кэһиилэр туһунан кодексатын (РФ АпК) 8.52 ыстатыйатын 3-с чааһынан 955 000 солкуобай суумалаах ыстарааптар түһэрилиннилэр.

Санатан эттэххэ, Ил Түмэн ыттары тутууну дьарыктыыр уонна уопсастыбаннай сирдэргэ хаһаайына суох кыыллары аһатары бобор сокуоннары ылыммыта.