“Сыл учуутала-2025” күөн күрэс кыайыылааҕын аата билиннэ

Саха сирин үөрэҕин систиэмэтигэр суолталаах тэрээһинэн буолбут “Сыл учуутала” өрөспүүбүлүкэтээҕи 34-с төгүлүн ыытыллар күөн күрэс түмүктэннэ.

Биэс күн тилэри ыытыллыбыт күөн күрэс кыттааччыларга чаҕылхай суолу хаалларан биллибэккэ ааһа оҕуста. Кыттааччылар умсугутуулаах уруоктары, чаҕылхай маастар кылаастары көрдөрөн уонна педагогическай интервью, блицтурнир тургутууларын ааһан үрдүк профессиональнай маастарыстыбаны көрдөрдүлэр. Педагогтар психолог-педагог кылаастарын үөрэнээччилэрин кытта көрсөн бэйэлэрин уопуттарын, билиилэрин үллэстиилэрэ ордук болҕомтону тарта.

Үөрэх уонна билим миниистирэ Нюргуна Соколова учууталлар уһулуччу кыахтарын, үөрэх сайдыытыгар кылааттарын бэлиэтээн туран, кыттааччылары тус бэйэтинэн эҕэрдэлээтэ. Бу курдук тэрээһиннэр педагог идэтин таһымын үрдэтэригэр, үүнэригэр-сайдарыгар улахан суолталааҕын ыйда.

Эспиэртэр уонна улахан дьүүллүүр сүбэ үлэлэрин түмүгүнэн биэс кыайыылаах аата быһаарылынна.

Биэс бастыҥнар бу бааллар:

• Драгина Евгения Юрьевна, В.А.Швыркова аатынан Арктика гимназиятын нуучча тылын, литэрэтиирэтин учуутала, Булуҥ улууһа;
• Прибылых Марина Николаевна, Г.И.Чиряев аатынан Бүлүү 1-кы нүөмэрдээх оскуолатын географияҕа учуутала, Бүлүү улууһа;
• Порядочных Юлия Юрьевна, Мииринэй куорат 7-с нүөмэрдээх оскуолатын нуучча тылын, литэрэтиирэтин учуутала;
• Яковлева Евдокия Ивановна, С.Васильев аатынан Ньурба элбэх хайысхалаах гимназиятын биологияҕа учуутала, Ньурба улууһа;
• Макарова Юлия Мироновна, С.К.Макаров аатынан Чурапчы улууһун гимназиятын английскай тылын учуутала, Чурапчы улууһа.
• Кинилэр кэккэлэригэр ирдэбилинэн бастыҥ үлэлээх биир муҥутуур кыайыылаах ааттанна —  Макарова Юлия Мироновна, С.К.Макаров аатынан Чурапчы улууһун гимназиятын английскай тылын учуутала, Чурапчы улууһа.

Бу күөн күрэс учууталлар үлэлэрин, талааннарын уонна үүнэр көлүөнэни иитии дьыалатыгар бэриниилээхтэрин билинэр бэлиэнэн буолла. Учууталларбытынан киэн туттабыт, салгыы ситиһиилэри, үрдүк кыайыылары баҕарабыт!

Бу туһунан Үөрэх уонна билим министиэристибэтин МАХ сыһыарыытыгар суруйаллар.