“Сыл ыала” Бүтүн Арассыыйатааҕы куонкуруска Саха сирин олохтоохторо кыайдылар

Горнай улууһуттан аҕыс оҕону иитэр Айтал уонна Саргылана Никаноровтар “Сыл ыала” Бүтүн Арассыыйатааҕы куонкуруска “Эдэр ыал” номинация кыайыылааҕынан ааттаннылар.   Наҕараадалааһын сиэрэ-туома Москваҕа “Россия” национальнай кииҥҥэ буолла.

“Биир дойдулаахтарбытын бу үрдүк наҕарааданан эҕэрдэлиибин. Никаноровтар оҕолорго таптал уонна бэйэ дьыалатыгар бэриниилээх буолуу дьиэ кэргэн үгэһин курдук бэриллэр педагогическай династияны салгыыллар. Кинилэр дьиэлэригэр элэккэй майгылаах, билиигэ-көрүүгэ тардыһар уонна учуутал үлэтигэр ытыктабыллаахтык сыһыаннаһар дьон иитиллэн тахсаллар.

Саха ыаллара сыл ахсын Арассыыйаҕа бастыҥнар кэккэлэригэр киирэллэрин көрөртөн үөрэбит. Бу биһиги сүрүн баайбыт – таптал, үлэни таптааһын уонна инникигэ эрэл олохсуйбут күүстээх ыалларын туһунан кэрэһилиир. Саха сирэ маннык дьонунан сайдар”, — диэн телеграм-каналыгар эрэгийиэн баһылыга Айсен Николаев суруйда.

Быйыл “Сыл ыала” куонкуруска дойду бүттүүнүттэн 10 тыһыынчаттан тахса ыал кыттыбыта. Арассыыйа бастыҥ ыаллара маннык номинациялары ыллылар:  “Элбэх оҕолоох ыал”, “Эдэр ыал”, “Тыа сирин ыала”, Кыһыл көмүс ыал”, “Ыал – үгэстэри илдьэ сылдьааччы”, “Аҕа дойдуну көмүскээччи дьиэ кэргэнэ”