Сылаас сыһыан, кыһамньы — кырдьаҕастарга бу дьиҥнээх үөрүү, дьол

В.П.Решетников аатынан кырдьаҕастар уонна инбэлииттэр өрөспүүбүлүкэтээҕи интэринээт-дьиэлэригэр олорооччулар күннэрэ бэйэ-бэйэтигэр маарыннаһар: биир кэм бэрээдэктээх күннэр, процедураларга сылдьыы, куруһуоктар уонна аймахтары күүтүү-кэтэһии. Ордук түннүгүнэн ахсынньы тымныытын уонна уулусса барыта туманынан бүрүллэр кэмигэр дьэ, кыһыҥҥы таарбаҕан күнүн билэҕин.

Ол гынан баран, биир кыһыҥҥы хабараан тымныылаах сарсыарда бу интэринээт-дьиэҕэ дьиҥнээх Саҥа дьыллааҕы дьикти түгэн буолла. Иһийбит чуумпуну массыыналар тыастара уонна дьон сэргэх саҥалара аймаата -– манна олорор дьоҥҥо «Золотник» ювелирнай хампаанньа үлэһиттэрэ кэллилэр. Кинилэр бэлэхтэри эрэ буолбакка, сүрүнэ -– кыһамньыны, сырдыгы-сылааһы уонна Саҥа дьыллааҕы настарыанньаны аҕаллылар.

Ол курдук, илии сылааһа иҥпит уонна истиҥ баҕа санаалардаах Саҥа дьыллааҕы бэлэхтэри интэринээт-дьиэ хас биирдии олохтооҕор туттардылар. Ону таһынан хампаанньа интэринээт-дьиэҕэ сытар дьону көрөргө-истэргэ наадалаах тэриллэри -– пеленкалары уонна подгузниктары биэрдилэр.

Интэринээт-дьиэ дириэктэрин солбуйааччы Ирина Садовникова:

– Бэйэм уонна дириэктэр Надежда Владимировна Шомоева аатыттан «Золотник» хампаанньаҕа кыһамньыларын уонна болҕомтолорун иһин, ону сэргэ биһиги интэринээт-дьиэбит олохтоохторугар үөрүүнү-көтүүнү аҕалбыккыт иһин махталбытын биллэриэхпин баҕарабын. Урут биһиэхэ араас тэрилтэлэр кэлэр этилэр, онтон кэнники сылларга биллэ аҕыйаатылар. Биһиги бииргэ үлэлииргэ мэлдьи бэлэммит уонна үтүө санаалаах кэлэктииптээх тэрилтэлэр уонна урбаанньыттар көмөҕө илиилэрин уунан кэллэхтэринэ олус үөрэбит. Кырдьаҕас дьон -– нэһилиэнньэ харыстабыла суох араҥатыттан биирдэстэрэ. Кинилэртэн үгүстэрэ, олох араас балаһыанньатынан, соҕотох хаалбыттар. Улуустарга олорор дьиэ кэргэннээх дьон эмиэ бааллар. Сүүс киһиттэн муҥутаан уон эрэ киһи дьиэтигэр Саҥа дьыллыы барар. Ол иһин, биһиги дьоммут чуҥкуйбаттарын курдук, араас тэрээһиннэри тиһигин быспакка ыыта сатыыбыт. Биһиэхэ куруһуоктар үлэлииллэр, успуорт саалата, бибилэтиэкэ бааллар уонна интэриэстэринэн көрөн араас тэрээһиннэр буолаллар.

Интэринээппит олохтоохторун ортолоругар уһулуччулаах уонна интэриэһинэй дьон элбэх. Саха сирин бастакы педиатр-бырааһа Мария Дмитриевна Аммосова, өрөспүүбүлүкэ үтүөлээх учууталлара уо.д.а. бааллар», -– диэн кэпсээтэ.

Биһиги СӨ култууратын үтүөлээх үлэһитэ, Учууталлар учууталлара уонна «Саха сирин киэн туттуута-2019» бочуоттаах ааты ылбыт Августа Федоровна Клакинованы кытары кэпсэттибит. Кини төһө да аҕам саастааҕын иһин, олоҕун хореографияҕа уонна үҥкүүгэ анаабыт буолан, билигин да олоххо көхтөөх, өйө-санаата уонна доруобуйата чэгиэн.

Августа Федоровна Клакинова:

«Мин Таатта улууһун Ытык Күөл сэлиэнньэтиттэн төрүттээхпин. 1961 сыллаахха Дьокуускай куоракка култуура уонна сырдатар училищеҕа үөрэнэ киирбитим. Мин бастакы учууталбынан Саха сирин биллэр-көстөр балерината Аксинья Васильевна Посельская буолбута. Онтон ыла олоҕум барыта хореографияны кытары ситимнэммитэ. Аҕам, култуура үтүөлээх үлэһитэ этэ, онон үҥкүүгэ тапталым киниттэн бэриллибитэ буолуо. Мин өр сылларга өрөспүүбүлүкэҕэ биллэр «Доҕордоһуу» уонна «Алгыс» үҥкүү ансаамбылларын салайбытым. Билигин 83 саастаахпын, интэринээт-дьиэҕэ олорбутум сыл курдук буолан эрэр. Үйэм тухары кулууп үлэһитэ буолан, дьону кытары үлэлээн, олох үөһүгэр сылдьыбытым. Манна биир саастыылаахтарбын кытары алтыһарбын сөбүлүүбүн. Ол гынан баран, ордук бириэмэбин бибилиэтэкэҕэ атаарарбын, ааҕарбын сөбүлүүбүн. Биһиги манна Национальнай бибилэтиэкэттэн кинигэ уларсар кыахтаахпыт. Бэйэм төрөппүт оҕолорум суох, ол эрэн сиэн оҕолор, эдьиийдэрим-балтыларым оҕолоро кэлэ сылдьаллар. Интэринээт-дьиэҕэ кэлэр туһунан бэйэм быһаарыммытым. Тоҕо диэтэххэ, сааһырбыт киһи дьиэтигэр-уотугар бэйэтэ олороро ыарахан. Кимиэхэ эрэ боҕуу буолуохпун баҕарбаппын. Тоҕо диэтэххэ, эдэрдэргэ олох да ыараата, элбэхтик үлэлиэхтэрин наада.

Оттон «Золотник» хампаанньаҕа өссө да сайда-үүнэ туралларыгар баҕарабын. Эһиги көмүс үлэһиттэрдээххит, кырдьаҕас дьоҥҥо болҕомтоҕут иһин улахан махтал, эһиги кэлэ сылдьыбыккытыттан бары үөрдүбүт!» -– диэн үөрүүтүн үллэһиннэ.

Бүгүҥҥү күн дьиҥнээх киэргэлинэн ырыаһыт Варя Аманатова ыалдьыттааһына буолла. Кини кылыһахтаах куолаһыттан, билэр матыыптарыттан уонна Саҥа дьыллааҕы ырыалартан бары мичээрдии олордулар уонна ытыстарын тыаһын харыстаабатылар, дьол хараҕын уута эмиэ биллэн ааста. Үгүстэр тэҥҥэ ыллаһа олордулар, ким эрэ хараҕын симэн олорон олоҕун үтүө кэмнэрин санаан ылла…

Бу күн интэринээт-дьиэ олохтоохторо кинилэри умнубаттарын, кинилэр соҕотох буолбатахтарын билэн, харахтара үөрүүнэн туолла. Кэлбит дьоҥҥо истиҥ махталларын тириэртилэр, кинилэр ыга кууһуулара уонна мичээрдэрэ ыалдьыттарга саамай бастыҥ наҕарааданан буолла.
«Золотник» хампаанньа тэрийбит үтүө санаа аахсыйата барыбытыгар элбэҕи санатта: дьиҥнээх баай-дуол -– сыаналаах киэргэллэр уонна таастар эрэ буолбатахтар, болҕомтоҕо уонна кыһамньыга олус наадыйар дьоҥҥо сырдыгы-сылааһы бэлэхтиири сатааһын. Ардыгар биир кыһыҥҥы күн дьиҥнээх бырааһынньык буоларыгар биир үтүө быһыы олус көмөлөөх уонна наадалаах.

«Золотник» ювелирнай  хампаанньа пресс-сулууспата