Сылаҥ уһуйаана байыаннай дьайыыга кыттар биир дойдулаахтарыгар көмөлөстө

Олунньу 10 күнүгэр Чурапчы улууһун Сылаҥ нэһилиэгэр интэриэһинэй уонна сэргэх тэрээһин буолан ааста. Аҕа дойду көмүскээччилэрин күнүн көрсө уонна Украинаҕа буола турар байыаннай дьайыыга кытта сылдьар биир дойдулаахтарын өйүүр сыалтан «Сулусчаан» уһуйаан кэлэктиибэ «Эйэлээх олох иһин!» диэн аахсыйа-кэнсиэри тэрийэн ыытта.

Кэрэхсэбиллээҕэ диэн, бу тэрээһиҥҥэ уһуйаан кэлэктиибэ эрэ буолбакка, иитиллээччилэр уонна төрөппүттэр туора туран хаалбакка, эмиэ көхтөөх кыттыыны ыллылар. Уһуйааҥҥа сылдьар уолаттар уонна кинилэр аҕалара күргүөмүнэн тахсан хоһоон аахтылар. Оттон күн күбэй ийэлэр — Сахайаана Герасимова, Алевтина Аммосова уонна Сардаана Игнатьева ыалдьыттарга анаан ылбаҕай ырыаларын анаатылар. Салгыы улахан бөлөх төрөппүтэ Анатолий Захаров эмиэ ырыа ыллаан бар дьону сэргэхситтэ.

Кэнсиэри Сылаҥ оскуолатын үһүс кылааһын үөрэнээччитэ Алиана Матвеева, алтыс кылааһын үөрэнээччитэ Алеша Пудов уонна СӨ култууратын туйгуна, блогер Ярослав Лебедев иилээн-саҕалаан ыыттылар.

Кэнсиэр иһинэн сүүйүүлээх оонньуу ыытылынна. Маныаха Чурапчы нэһилиэгэр баар эргиэн кииннэрэ — «Туйаара», «Эгэлгэ», «Стайер», «Ситим», «Суолдьут», «Маарыкчаан», «Твой букет», «Дом цветов» маҕаһыыннар өйөөн, сыаналаах бириистэри туруордулар.

Сылаҥ нэһилиэгин урбаанньыттара уонна тэрилтэлэрэ тэрээһиҥҥэ көмөлөстүлэр. Ол курдук, Сылаҥ нэһилиэгин ыраах айаҥҥа сылдьар суоппардара супер-бириистэри туруоран, аахсыйаҕа кыттыстылар: «Штиль» эрбии, күлүүс нобуора, шкаф-купе. Олохтоохтор Прасковья Николаевна Дьячковская, Константин Семенович Федоров, Саргылана Николаевна Макарова улахан бириистэри сүүйэн үөрүүлэрэ үксээтэ.

«Сулусчаан» уһуйаан тэрийбит аахсыйатыттан киирбит үп-харчы — 105 тыһыынча солкуобай байыаннай дьайыыга кытта сылдьар биир дойдулаахтарыгар ананна. Кэлэктиип көмө харчыны саллааттарга кыайыыны-хотууну баҕаран туран ыытта.