Сылгы иитэр бааһынай хаһаайыстыбатыгар сааскы түбүктэр

Сылгы иитээччилэргэ сааскы эппиэттээх күннэр тураллар. Төрүөх саҕаланна. Ол курдук, Горнай улууһун Аһыма сэлиэнньэтин олохтооҕо “Кардашевскай А.И.” бааһынай хаһаайыстыбатыгар эмиэ түбүк-садьык үгүс.

Антон Иванович орто оскуоланы 2004 с.  үөрэнэн бүтэрбитэ. Оччолорго аҕата доруобуйатынан инбэлиит буолан, эдэр уол 2005 сылтан бааһынай хаһаайыстыба тэриммитэ. Дьэ, ити сыллартан тыа хаһаайыстыбатын ыарахан, ымпык-чымпык үлэтигэр сыстыбыта. Бэйэтэ этэрин курдук, билигин икки биэттэн саҕалаан сүүстэн тахса төбөнү иитэр.

Сылгыларын баазатыгар дэриэбинэттэн кэлэ-бара 50 км айанныыр. Аныгы киһи сиэринэн массыынанан сылдьар эбит. Бааһынай хаһаайыстыба баһылыга быйыл сылгы кыстыга от кэмчититтэн ыарахаттардааҕын туһунан этэр.

— Бу ааспыт сайын от үүнүүтэ мөлтөх этэ. Аны кэнчээри тахсыбатаҕа. Инньэ гынан, кыһалҕаттан Кэбээйи улууһуттан биэс массыына оту атыыластым. Быйыл от тиэйиитигэр 250 тыһ. солк. ороскуоттаабыппыттан 140 тыһ. солк. СӨ Тыатын хаһаайыстыбатын уонна ас-үөл бэлитикэтин министиэристибэтин нөҥүө толуйулунна. Хата, эбиэһи Аллараа Бэстээхтэн “Саха-фермер” тэрилтэттэн атыыласпытым. Сыаната удамыр, онон өссө ылларбыт абыраныа этибит. Улахан сылгыларбар, кырдьаҕас өттүлэригэр эбиэс биэрэбин, — диир уопуттаах сылгыһыт.

Хаһаайыстыба баһылыга сүрүн кыһалҕанан оттуур сир кырыымчыгын ааттыыр. Түүлэһэн оттуоҕун аренда сыаната ыарахана чаҕытар. Ону тэҥэ үлэһит илии тиийбэтэ сүрүн кыһалҕанан буолбут. Ол курдук, аҕатын саастыыта дьону үлэлэтэ сылдьар. Сайыҥҥы-күһүҥҥү өттүгэр сылгылары адьырҕа кыыл – тыатааҕы моһуоктуурун этэр. Бэл, кэнники сылларга сыл аайы кэриэтэ бу адьырҕаны бултаабыттар.

Тыа хаһаайыстыбатын салаатыгар бу адьырҕалартан сылтаан ночоот тахсыбатын уонна дьон олоҕор куттал суоһаабатын туһугар бу кыыл ахсаанын сүрүннээһиҥҥэ лиссиэнсийэни биэрэллэрин  иһин Горнай улууһунааҕы Экологияны судаарыстыбанан кэтээн көрүүгэ иниспиэксийэтин салайааччыта Родион Владимирович Сергеевка уонна кини үлэһиттэригэр  махталын тириэртэ.  Ол эрээри, сүрүннээһиҥҥэ диэн үс күн эрэ болдьохтооҕо кылгаһын этэр.

Өссө Дьөһөгөй оҕотун иитиинэн дьарыктанар киһини көрөн-истэн муҥнаммыт сылгыларыгар сүтүк тахсара хомотор. Ол курдук, былырыын күһүн Уус Алдантан ылбыт икки атыыра хаар түспүтүн кэннэ сүппүт. Хойукка диэри көрдөөбүттэр даҕаны, булбатахтар. Былырыын ол курдук икки атыыр, 3 биэ сүтүктээх.  Дьэ, ити курдук, сылгыларын дэлэтэр туһугар бары күүһүн-кыаҕын ууран үлэлиир Антон Иванович кыһалҕата үгүс. Ол да буоллар, санаатын түһэрбэт, хаһаайыстыбатын бигэ туруктаах оҥорорго кыһанар.

— Хата, сылгым, убаһам этин Дьокуускайга “Дархан” рестораҥҥа туттаран, абыранным. Иккис сылбын кинилэргэ биэрэбин. Тута төлүүр буолан, абыраатылар. Онон кинилэргэ махтанабын, — диир Антон Кардашевскай.

Кыстыгы этэҥҥэ туораатахтарына, аны сайыҥҥы от үлэтэ күүтэр. Икки МТЗ-82 тыраахтардаах. Онон рулоннаах оту бэлэмнииллэр.

Бэйэтэ туруу үлэһит киһи кыыһын уонна уолун сылгы иитиитин ымпык-чымпык үлэтигэр эмиэ сыһыарбыт. Оҕолор көмөлөһөн абырыыллар эбит. Тыа сиригэр оҕолору үлэнэн иитии диэн итинник буоллаҕа. Онон биэс оҕолоох аҕа оҕолоругар холобур буолар.

Хаартыскалары: А.Кардашевскай ыытта.