Сылгы иитиитин сайдыытын дьүүллэһиэхтэрэ

Сарсын, сэтинньи 29 күнүгэр,  Дьокуускайга “Сылгыны үөрдээн иитии – ааспыт, билиҥҥи уонна кэлэр кэм” диэн Бүтүн Арассыыйатааҕы научнай-практическай кэмпириэнсийэ ыытыллыаҕа.

Кэмпириэнсийэ тыа хаһаайыстыбатын наукатын дуоктара, Саха Өрөспүүбүлүкэтин үтүөлээх зоотехнига, СӨ судаарыстыбаннай бириэмийэтин лауреата, М.Г.Сафронов аатынан ТХНЧИ лабораториятын сэбиэдиссэйэ Иванов Реворий Васильевич 70 сааһыгар ананар. Арассыыйа таһымнаах тэрээһиҥҥэ СӨ Тыатын хаһаайыстыбатын уонна аска-үөлгэ бэлиитикэтин миниистирэ Артем Александров сүрүн дакылааты оҥоруоҕа.

Арассыыйаҕа бородууксуйаны биэрэр сылгыны иитии туругун уонна кэскилин туһунан Бүтүн Арассыыйатааҕы НЧИ  тыа хаһаайыстыбатын дуоктара Валерий Болаев, “ЮжУралПлемАктив” ХЭТ генеральнай дириэктэрэ Ольга Аксенова, Саха сиригэр сылгыларга племенной үлэни тэрийии туһунан “Сахаагроплем” тэрилтэ салайааччыта Алексей Жирков, татаар боруодатын генетическэй структуратын туһунан Ленар Загидуллин (Татарстан), Башкир сылгытын сайдыытын туһунан Камид Фархутдинов (Башкортостан), Бурятияҕа сылгыны үөрдээн иитии туһунан Цырен Жаргалов (Бурятия) уо.д.а. дакылааттарын истиэхтэрэ. Онон үрдүк научнай таһымнаах кэмпириэнсийэ буолара күүтүллэр.

Кэмпириэнсийэ кыттыылаахтара салгыы Ньурба улууһун сылгы баазаларын көрүөхтэрэ, Ньурбаҕа баран иһэн Бүлүү улууһун сылгы баазатыгар таарыйыахтара.