Сылы түмүктүүр алгыстаах Оһуокай

Ахсынньы 28 күнүгэр өрөбүллээҕи Оһуокайбыт буолла.Быйыл иккис сылын Чысхаан кэлэн алгыстаах оһуокайы таһаарда.

Чысхаан оруолун РФ үтүөлээх,СӨ народнай артыыһа, биһиги түмсүүбүт үтүөлээх этээччитэ Дмитрий Артемьев толордо. Оһуокай түмсүү бэрэссэдээтэлин солбуйаачччы Александр Тарскай Оһуокай түмсүүтүн көхтөөх чилиэттэригэр Дьокуускай куорат уокуругун култуура уонна духуобунас управлениетын махтал суруктарын туттарда. Оһуокай республикатааҕы түмсүүтүн бэрэссэдээтэлэ Александр Джурович Данилов-Дьулуур Хаан сыл түмүгүнэн «Сыл бастыҥа» диэн ааттары Дархан этээччилэргэ Валентин Хоруновка, Марта Николаеваҕа, үтүөлээх этээччи Мария Ивановаҕа, кынат, арчыһыт Айыы Уолана Алааска, өрөбүллээҕи Оһуокай тэрийээччитигэр Ирина Абрамоваҕа туттарда. Кэлэр 2026 сылга Арассыыйаҕа норуоттар сомоҕолоһууларын, Саха сиригэр култуура сылларыгар өссө ситиһиилээхтик үлэлииргэ ыҥырда. Быйыл Кыайыы 80 сылынан хаһааҥҥытааҕар да Оһуокай түмсүүтэ ситиһиилээхтик, ыччаты кытары утумнаһыы күүскэ барда. Ол үтүө үлэ күүскэ салҕанарыгар ыҥырда.
Спортивнай күрэхтэһиилэри Данил Пестряков, Александр Тарскай үрдүк таһымнаахтык ыыттылар. Тоҕус бастыҥ кыайыылаахтар сыаналаах бириистэри туттулар. Киирии билиэтинэн бириистээх лотерея оонньонно. Сүрүн бирииһи, сыаналаах төлөпүөнү Александра Михайлова ылан, үөрүүтэ үтүмэн.

Кэлбит дьон барыта Александр Джуровичтан «Одарич» сертификатынан кэһиилэнэн бардылар. Алгыстаах Оһуокай, эҕэрдэнэн ырыа кэлбит ыалдьыттарбыт санааларын көтөхтө.

Марта Николаева