Сүмэлээх сүбэлэр

Кылабачыгас кырааҥҥа таммах, тарбах суола хаалбатын туһугар – сууйан-сотон баран, оливковай арыыга илитиллибит ыраас тирээпкэнэн сотуҥ. Оччоҕо уу сыстыбат, илии суола хаалбат.

— Бааннайга баар сиэркилэ сиигирбэтин диэн, эр киһи бытыгын хорунарыгар туттар күүгэнин (пена для бритья) салпыаккаҕа ыстаран баран, сотуохха сөп.
— Хоруорбут көстүрүүлэни сууйарга ууну уонна 1 чааскы уксууһу кутан баран, оргутуҥ. Уотун арааран баран, суоданы кутуҥ. Күүгэннирэн бүттэҕинэ, сойдоҕуна, уутун тоҕуҥ. Хоруо хаалбыт буоллаҕына, суоданан аалыҥ.
— Быылы сотор тирээпкэни таҥаһы сайҕыыр кондиционерынан илитэн баран, сотуҥ, оччоҕо быыл мээнэ иҥмэт, түспэт буолар, лаппа аҕыйыыр. Куукуна ыскаабын үрдүгэр быыл уонна ас чаана булкуһан, ньаҕара курдук сыстан хаалбыт буолааччы. Оннукка тиэрдибэт туһуттан, эрдэттэн ыскаап үрдүгэр пергамент кумааҕытын, ыскаатары, эбэтэр, фольганы тэлгээҥ.
— Микроволновканы ыраастыырга көмүһэ суох фарфор, эбэтэр өстүөкүлэ иһиккэ тэҥ тэҥҥэ ууну уонна уксууһу кутан баран, 1 устуука тииһи ыраастыыр маһы (зубочистка) уган, 5-10 мүнүүтэҕэ холбооҥ. Иһити хостоон баран, 2-3 мүнүүтэ күүтэ түһүҥ, онтон сууйан кэбиһиҥ. Кирэ-хоҕо түргэнник хоҥнон кэлиэҕэ.
— Өрөмүөн кэннэ дьиэҕэ кырааска сыта иҥэн хаалбыт буоллаҕына, икки-үс сиргэ туустаах ууну уурдахха, куһаҕан сыт түргэнник ааһар, киһи төбөтө ыалдьыбат.
— Кырааска таҥаска биһиллибит буоллаҕына, ацетон, скипидар, нашатырнай испиир көмөлөһөллөр. Хаппыт кырааска­лаах таҥаһы скипидарынан сотон, сытыара түһүллэр, онтон үрдүгэр суода кутан, аалыллар. Саҥа биһиллибит бээтинэни тыҥырах лааҕын ыраастыыр убаҕаска баар ацетон түргэнник суох гынар. Хаһаайыстыбаннай маҕаһыыҥҥа атыыланар уайт-спирит эмиэ көмөлөһөр.