Сымыйа арыгыны атыылаары былааннаммыт дьону туттулар (ВИДЕО)

Араас хайысханан дьону албыннаан, түөкэйдээн харчыны оҥорооччулар элбэхтэр. Ол курдук, контрафактнай дэниллэр арыгыны оҥорон таһааран атыылааччылар бааллар. Бу күннэргэ сымыйа арыгыны оҥорор сыахтаах дьону Нерюнгри оройуонугар туттулар. 

Сокуонунан мэктиэлэммэт биисинэс өҥөтүн ыраах Азербайджантан кэлбит дьон аһан үлэлэппиттэр. Беркакикка гараас атыыласпыттар уонна дьэ онно буокка арааһын «кутан» саҕалаабыттар. Ол гынан баран, хара санаалара олоххо киирбэтэх. Полиция үлэһиттэрэ урут түһэн барытын билэ охсон, сымыйа буокканы оҥорооччулары харыларыттан харбаан туппуттар.

Гараас иһиттэн барыта 3600 маарката суох испиирдээх бытыылканы уонна 100-тэн тахса 10-нуу лиитэрэлээх испиирдээх канистраны булбуттар. Ону тэҥэ, 3000 устуука өстүөкүлэ таараны уонна сымыйа арыгыны оҥорон таһаарарга  аналлаах буккуйар, кутар тэрили булан былдьаабыттар.

Биллэн турар, Холуобунай дьыала тэрилиннэ. Түөрт киһи тутулунна: үһэ 26, биирдэрэ 27 саастаахтар. Силиэстийэ барытын быһаарыа.

Хаартыска — СИА