Сымыйа докумуоннаах миграннары туттулар

Дьокуускайга полиция үлэһиттэрэ сымыйа докумуоннаах үс миграны туттулар.

ИДьМ миграция боппуруоһунан дьарыктанар Дьокуускайдааҕы салааҕа миграционнай учуоттарын уһаттараары 24, 31, 34 cаастаах  Кыргызстан үс олохтооҕо кэлбит.  Бэрэбиэркэ кэмигэр полиция үлэһиттэрэ быһаарбыттарынан,  бу дьон докумуоннара сымыйата биллибит. Кыргызстан олохтоохторо этэллэринэн, бу докумуоннары кинилэр интэриниэт ситимигэр биллэриинэн  атыыласпыттар.

Онон докумуону сымыйанан оҥоруунан бэрэбиэркэ үлэтэ саҕаланна.  Ол курдук РФ Холуобунай кодексатын 327 ыст. буруйу оҥоруу састааба көстөр. Эспэртиисэ түмүгүнэн, ИДьМ 3-с №-дээх полиция салаата сокуон хараҕынан быһаарыы ылыаҕа диэн ИДьМ пресс-сулууспата иһитиннэрэр.