Сымыйа суоппар быраабын 100 тыһ. солкуобайга атыыласпыт

Эр киһи кэпсээбитинэн, хас да сыллааҕыта атын эрэгийиэҥҥэ авто-оскуолаҕа үөрэммит, ол эрээри  ГИБДД-га эксээмэн туттарбатах.

Биирдэ мессенджергэ суоппар ыытар быраабын дастабырыанньатын атыылааһын туһунан биллэриини көрбүт. Итиэннэ атыылаһар сыаллаах ыйыллыбыт хантаагынан билбэт киһитин кытары сибээстэспит. Туһааннаах өҥө сыаната 100.000 солк. эбит. Эр киһи бастаан  30.000 солк. ыйыллыбыт счекка ыыппыт. Итиэннэ  пааспарын куоппуйатын, хаартыскатын ыыппыт.

10 хонугунан эр киһи суоппар дастабырыанньатын хаартыскатын туппут. Докумуону кэлин буостанан ыыппыттар. Сымыйа быраабы атыыласпытын туһунан кимиэхэ да кэпсээбэтэх уонна массыынаны көҥүл ыыта сылдьыбыт.

Алтынньы бүтүүтэ эр киһи массыынанан айаннаан истэҕинэ ГАИ  патрула тохтоппут уонна докумуонун бэрэбиэркэлээбит. Докумуонун саарбаҕалаан уонна эр киһиттэн арыгы сыта кэлэрин иһин, полицейскай боротокуол толорбут.

Билигин эр киһиэхэ сымыйа докумуону атыыласпытынан уонна ону туһана сылдьыбытынан  сибээстээн ИДьМ Алданнааҕы салаата холуобунай дьыала көбүттэ.