Түөкүттэр сыттык, матараас атыылаан 70 киһини албыннаабыттар

Дьокуускай куорат суута үс гражданиҥҥa сыһыаннаах холуобунай дьыаланы көрдө. Кинилэр РФ Холуобунай Кодексатын 159-с ыстатыйатын 4-с чааһынан (түөкүннээһин, тэриллиилээх бөлөҕүнэн эбэтэр ордук бөдөҥ кээмэйинэн буруйу оҥоруу) буруйу оҥорууга буруйданнылар.

Бу туһунан Саха сиринээҕи Холбоһуктаах сууттарын пресс-сулууспата иһитиннэрэр. Суут кэмигэр быһаарыллыбытынан, 44 саастаах буруйдаах  2016 сыллаахха Дьокуускайга «Здоров» атыы-эргиэн мааркатын бородууксуйатын – матараас, сыттык уонна варикоһу утары баандастары үрдүк сыанаҕа атыылыыр аатыран, доруобуйаларынан хааччахтаах дьон харчытын албыннаан уорар сыаллаах тэриллиилээх бөлөҕү тэрийбит.

Сүрүн атыылаһааччыларынан биэнсийэлээхтэр, инбэлииттэр, сэрии уонна үлэ бэтэрээннэрэ буолбуттар. Түөкүттэр кинилэри доруобуйаларын туругун туһунан сымыйанан итэҕэтэн, бу бородууксуйа эпэрээссийэтэ, эминэн эмтэниитэ суох бары, ол иһигэр ыар ыарыылартан үтүөрдэр дьайыылаах диэн албыннаабыттар. Ону таһынан дьону-сэргэни «Здоров» кэмпилиэктэрин бэйэлэрин мунньуммут харчыларыгар эбэтэр баантан кирэдьиит ылан атыылаһалларыгар итэҕэппиттэр.

Холуобунай дьыала чэрчитинэн өрөспүүбүлүкэ 70-тан тахса олохтооҕо эмсэҕэлээччинэн билинилиннэ. Суут мунньаҕар буруйдаахтар буруйдарын билиммэтилэр, ол эрээри эмсэҕэлээччилэргэ оҥорбут хоромньуларын толуйдулар.

Суут бириигэбэринэн үс буруйдаах РФ ХК 159-с ыстатыйатын 4-с чааһынан буруйдаахтарынан билиннилэр. Кинилэр 4 сылтан 3 сылга диэри усулуобунайдык көҥүллэрэ быһыллыаҕа. Бириигэбэр сокуоннай күүһүгэр киирэ илик.