Сүппүт балыксыттар өлүктэрэ көһүннэ

Бэҕэһээ икки балыксыт сүппүтүн туһунан саайпытыгар суруйбуппут. СӨ Быыһыыр сулууспата иһитиннэрбитинэн, икки сүппүт киһи өлүгэ бэҕэһээ киэһэ көһүннэ.

Санатан эттэххэ, ахсынньы 6 күнүгэр Дьокуускайга икки эр киһи  балыктыы барбыттар, ол эрээри кэмигэр  дьиэлэригэр төннүбэтэхтэр. Эр дьон сүппүтүн туһунан иһитиннэрии ахсынньы 8 күнүгэр сүппүт дьонтон биирдэстэрин кэргэниттэн киирбит.  Кинилэри көрдүү үс быыһааччы уонна волонтердар биэс массыынанан айаннаабыттар.  Балыксыттар чопчу хайа сиргэ барбыттара биллибэт буолан, Дьокуускайтан саҕалаан Нам сиригэр диэри көрдөөбүттэр. Бүтэһигин сибээскэ Намтан тахса сылдьыбыттар.

Бэҕэһээ 21.44 ч. волонтердар  «Петровская Курья» диэн сиргэ балыксыттар өлүктэрин массыыналарыттан булбуттар.  Билигин туһааннаах түбэлтэнэн полиция дьарыктаныаҕа диэн Быыһыыр сулууспа иһитиннэрдэ.