Сүппүт эр киһини ааспыт сылтан көрдүүллэр

Орто Халыма улууһугар сүппүт эр киһини көрдөөһүн үлэтэ салҕанар.

Ахсынньы 26 күнүгэр  Орто Халыма куорат олохтооҕо  69 саастаах кэргэнэ ахсынньы 13 күнүттэн сибээскэ тахса илик диэн Быыһыыр сулууспа үлэһиттэригэр иһитиннэрбитэ.

Дьахтар кэргэнэ куораттан 15 км Сайылык диэн учаастакка баар диэн кэпсээбитэ. Кэлин биллибитэ, эр киһи өссө эрдэ,  сэтинньи бүтүүтэ, сүппүт эбит.

Ахсынньы 27 күнүттэн саҕалаан Халыматааҕы быыһыыр-көрдүүр этэрээт сүппүт киһини көрдүүллэр. Сүппүт киһи урукку суолунан, Богдановка күөлгэ, дьиэтин таһынааҕы сирдэри чинчийдилэр.

Тохсунньу 3 күнүгэр көрдүүр үлэҕэ 7 киһи, ол иһигэр Халыматааҕы ПСО, доброволецтар уонна полиция сотруднига сырыттылар.  Сүппүт киһини бүтэһигин көрбүт сирдэригэр көрдөөтүлэр да, туох да түмүгү аҕалбата.