Оҕону түүнү быһа көрдөөбүттэр

Тоҕус саастаах уол оҕо сүппүтүн туһунан иһитиннэрии киирэн, быыһааччылар сүппүт оҕону түүнү быһа көрдөөбүттэр.

Кини Киров уулуссатыгар турар оскуолаттан 14.00 ч. тахсыбыт уонна дьиэтигэр тиийбэтэх. Оҕону Саха сирин Быыһааччыларын сулууспатын дьуһуурунай симиэнэтэ, полиция, Дьокуускай куорат аварийнай-быыһыыр муниципальнай сулууспатын быыһааччылара көрдөөбүттэр.

Быһаарыллыбытынан, оҕо хойукка диэри оонньуу сылдьыбыт уонна атын дьиэ подъеһыгар киирэн хонорго быһаарыммыт. Бу туһунан СИА ИДьМ пресс-сулууспата иһитиннэрэр.

«Оҕо ийэтэ полицияҕа киэһээ 19.00 ч. тыллаабыт. Тоҕустаах уолчаан хойукка диэри табаарыстарын кытары оонньообут. Итиэннэ дьиэтигэр барарыттан куттанан, Орджоникидзе уулуссатыгар турар элбэх кыбартыыралаах дьиэ подъеһыгар хонорго быһаарыммыт. ПДН иниспиэктэрдэрэ ийэтин уонна бу оҕону кытары профилактическай бэсиэдэ ыыппыттар», — диэн Саха сирин ИДьМ пресс-сулууспата СИА иһитиннэрбит.