«Сүппүт суруктар» Киин Азия уонна СНГ дойдуларын бастыҥ ойуулугунан ааттанна

«Сүппүт суруктар» диэн кылгас кээмэйдээх сахалыы ойуулук Алматыга ыытыллыбыт Киин Азия уонна СНГ дойдуларын «Almaty Animation Festival» диэн киинэ бэстибээлигэр «Бастыҥ ойуулук» номинацияҕа кыайда.

Киинэ бэстибээлэ от ыйын 26-28 күннэригэр Казахстан Алматы куоратыгар ыытылынна. «Сүппүт суруктар» диэн 11 мүнүүтэ уһуннаах ойуулугу Александр Игнатьев-Кыһыҥҥы Ойуур диэн худуоһунньук биэс сылы быһа оҥорон, быйыл түмүктээбитэ. Бу ойуулук быйыл Финляндияҕа ыытыллыбыт киинэ бэстибээлигэр улахан экрааҥҥа сүрэхтэммитэ.

Дьаамаҕа түһэн баран атын эйгэҕэ тиийбит доҕордуулар туһунан ойуулук буолар диэн SakhaCinema телеграм-ханаал суруйар.