Сырдык сыдьаайдаах Далбарбыт

От ыйын өҥүрүк куйаас күнүгэр, от ыйын 11 күнүгэр, 80 сыл анараа өттүгэр учуутал И.А.Попов дьиэ кэргэнигэр Изабелла күн сирин көрбүтэ.

Айыылара айбыттарыныы, итии, сылаас, амарах дууһалаах учуутал Изабелла Ильиничнаны ким да 80 саастаах курдук көрбөт. Ол курдук кини мэлдьи элэккэй, кэрэ, кыраһыабай Далбарбыт буолар. Изабелла Ильинична Сунтаар 2 нүөмэрдээх орто оскуолатыгар нуучча тылын учууталынан үлэлээбитэ уонна Сунтаар улууһугар аҕатын кытта бииргэ төрөөбүт убайа, Саха народнай поэта Л.А.Попову үйэтиппит киһинэн сыаналыыбын. Изабелла Ильинична бочуоттаах сынньалаҥҥа тахсан баран, убайа, народнай суруйааччы Л.А.Попов төрүттэрин туһунан кинигэни суруйан, бэйиэт аатын үйэтитиигэ улахан үлэни оҥордо. Суруйааччы, бэйиэт аатынан улуустааҕы киин библиотека, дойдутугар музей, хас күһүн ахсын Сунтаарга Леонид Поповка аналлаах көмүс күһүн ааҕыылара тэриллэр. Онон бэйиэт аата мэлдьи ахтылла турар. Оттон убаастабыллаах юбилярбыт, Далбарбыт Изабелла Ильинична мэлдьи үөрэнээччилэрин, доҕотторун, аймахтарын кытары сибээһин тута сылдьар. Кини юбилейыгар мэлдьи үөрүүнэн кэлэбит. 80 сааһын туолбут дьоро күнүгэр Сунтаар улууһун баһылыгын социальнай боппуруостарга солбуйааччы Г.М.Еремеев, культура уонна духуобунас управлениетын начальнига С.Д.Омукова,Сунтаар 2 нүөмэрдээх орто оскуолатын учууталлара кэлэн эҕэрдэлээтилэр.

Изабелла Ильиничнаҕа өр сыллаах үлэтэ сыаналанан Сунтаар улууһун бочуоттаах гражданина үрдүк аат иҥэриллибитин туоһулуур дастабырыанньаны туттарда.
Изабелла Ильинична юбилейыгар анаан нууччалыы тылынан дьүөгэлэрин тустарынан » Дорогие сердцу моему…» диэн кинигэтин бэлэх уунна. Изабелла Ильинична орто оскуоланы 1963 сыллаахха бүтэриэҕиттэн бииргэ үөрэммит оҕолорун кытары сибээһин тута сылдьар. Билигин сорохторо олохтон туораабыттарын да иһин, тутуспутунан сылдьаллар эбит. Бииргэ үөрэммит доҕоро, РФ үөрэҕириитин бочуоттаах үлэһитэ,учуутал Ю.В.Мекумянов Сунтаартан кэлбит. Изабелла Ильинична кинигэтигэр оҕо сааһыттан доҕордоспут дьүөгэлэрин, үлэлии сылдьан чугастык алтыспыт биир идэлээх дьүөгэлэрин тустарынан суруйбутун биир тыынынан аахтым. Наҕылыччы анаан аахтахха, хас биирдии дьүөгэтин туһунан истиҥ суруйуута — бу орто олохпут умнуллубат кэрэһиттэрин олоҕо буолар.
Күндү Далбарбыт мааны астаах сахалыы сандалытыгар элбэх истиҥ тыл этилиннэ. Күндү Изабелла Ильинична уһуннук олор,өссө саҥа толкуйу тобулан, саҥа кинигэ суруйаргын күүтэбит. Күндү киһибит,этэҥҥэ сырыт!

Марта Николаева