Сүрэх-тымыр киинигэр үс сыл иһигэр 17 тыһ. тахса киһи эмтэннэ

М.Е. Николаев аатынан Өрөспүүбүлүкэтээҕи 1 №-дээх балыыһа – Национальнай мэдиссиинэ киинин саҥа Сүрэх-тымыр киинигэр үс сыл иһигэр 17 тыһ.тахса  Саха сирин олохтооҕо эмтэннэ, диэн СӨ Доруобуйа харыстабылын министиэристибэтэ иһитиннэрэр.

Бу тэрилтэҕэ сүрэххэ уонна тымырга 5 тыһыынчаттан тахса эпэрээссийэ оҥоһулунна, онтон 52% – суһал эпэрээссийэлэр. Ону таһынан, Сүрэх-тымыр киинин исписэлиистэрэ киин улуустааҕы балыыһалары кытта 2 тыһыынчаттан тахса виртуальнай  көрүүнү ыытан, уопуту атастаһарга уонна дьаһалы ситимнииргэ биир кэлим идэлээх эйгэни тэрийдилэр.

«Бу үс сыл иһигэр биһиги дьону эмтээтибит эрэ буолбатах – биһиги ыраах сытар сир үрдүк хаачыстыбалаах мэдиссиинэ көмөтүн ыларга мэһэй буолбат эйгэтин олохтоотубут. Хас биирдии көрдөрүү, хас биирдии сыыппара – бу ким эрэ дьылҕата, ким эрэ эрэлэ. Биһиги ситиһиилэрбитинэн киэн туттабыт, ол гынан баран иннибитигэр РФ Бэрэсидьиэнэ Владимир Путин туруорбут «Уһун уонна көхтөөх олох» национальнай бырайыагын соруктарын ситиһэргэ өссө да үгүс ыарахаттар баалларын билэбит», – диэн М.Е. Николаев аатынан Өрөспүүбүлүкэтээҕи 1 №-дээх балыыһа – Национальнай мэдиссиинэ киинин генеральнай дириэктэрэ Станислав Жирков бэлиэтээтэ.

Дьокуускай куорат олохтооҕо Игорь Бушин сүрэх-тымыр киинигэр ситиһиилээхтик стентирование эпэрээссийэтин ааста. Кинини тэрилтэҕэ суһал көмө массыынатынан аҕалбыттар. «Икки чаас буолан баран, миигин эпэрээссийэҕэ киллэрэн, стенты туруорбуттара. Мин манна 2022 сыллаахха сылдьыбытым, быраастар сыһыаннара уруккутун курдук үрдүк таһымнаах. Киин усулуобуйата кэрэ: аныгылыы тэриллээх, пациеҥҥа табыгастаах», – диэн Игорь Бушин үллэһиннэ.

М.Е. Николаев аатынан Өрөспүүбүлүкэтээҕи 1 №-дээх балыыһа – Национальнай мэдиссиинэ киинин Сүрэх-тымыр киинэ 2022 сыл муус устар 30 күнүгэр аанын арыйбыта. Тэрилтэ Саха Өрөспүүбүлүкэтин экэниэмикэ үүнүүтүн кииннэрин социальнай сайдыыларын былаанын чэрчитинэн «Уһук Илин уонна Забайкалье» федеральнай бырагыраама көмөтүнэн тэриллибитэ.