Сүрэхтэрин баҕатынан, илиилэрин сылааһынан

Ил Дархан Ил Түмэҥҥэ Туһаайан этиитигэр байыаннай дьайыы кыттыылаахтарыгар, кинилэр дьиэ кэргэттэригэр уопсастыбаннас улахан көмөнү оҥорорун тоһоҕолоон бэлиэтээбитэ. Ол курдук улуустарга, куораттарга “Мы вместе” ыстааптар, “Якутия с тобой!” хамсааһын, “Защитники Отечества” пуонда салаата, Аҕа дойду буойуттарын дьиэ кэргэттэрин кэмитиэтэ, волонтерскай түмсүүлэр, Уопсастыбаннай балаата, Бүтүн Арассыыйатааҕы норуот фрона үлэлииллэр.

“Байыаннай сулууспалаахтар дьиэ кэргэттэрин өйүүрбүтүттэн үөрэбит“

Байыаннай дьайыы саҕаланыаҕыттан волонтердар биир бастакынан тыыл инники кирбиитигэр киирбиттэрэ. Байыаннай дьайыы кыттыылаахтарыгар, кинилэр дьиэ кэргэттэригэр бары өттүнэн өйөбүлү оҥорон барбыттара.

#МЫВМЕСТЕ Бүтүн Арассыыйатааҕы аахсыйа эрэгиэйиэннээҕи ыстаабын салайааччыта Айыллаан Винокуров этэринэн, үлэ бары хайысханан бара турар. Ааспыт күннэргэ волонтердар, сүрүннээн, олбуортан хаары таһаарыыга үлэлээбиттэрэ. Онон Байыаннай дьайыы кыттыылаахтара уонна кинилэр дьиэ кэргэттэрэ 122 быһа лииньийэ, 6 кунуопкатыгар эрийэн, сайаапкаларын хаалларалларын санаталлар.

Бу дьиҥнээх норуот өйөбүлэ – мин байыаннай сулууспалаахтарга, кинилэр дьиэ кэргэттэригэр сүрэхтэрин баҕатынан көмөлөһөр, туора турбатах дьоҥҥо махталбын тиэрдэбин”, – диэбитэ Айсен Николаев.

Маны тэҥэ “Якутия с тобой!” өрөспүүбүлүкэтээҕи уопсастыбаннай хамсааһын актыбыыстара байыаннай дьайыы кыттыылаахтарыгар анаан аадырыстаах баһыылкалары, гуманитарнай көмөнү хомуйа олороллор.

Аадырыстара: Бестужев‑Марлинскай уул. 5 (ДОСААФ дьиэтэ), олбуор өттүнэн киириллэр.

* * *

Соторутааҕыта Дьокуускай к. уокуруктааҕы дьаһалтатын Уопсастыбаны кытта сибээскэ уонна ыччат бэлиитикэтигэр управлениетын үлэһиттэрэ волонтердары кытта хаар ыраастыыр аахсыйаны ыыппыттара.

«Байыаннай сулууспалаахтар дьиэ кэргэттэрин өйүүрбүтүттэн үөрэбит, маннык аахсыйалар уопсастыба уустук кэмҥэ түмсүүлээҕин көрдөрөллөр», — диэн бэлиэтээтэ Управление салайааччыта Андрей Михайлов.

Күүстэрин-күдэхтэрин кыайыыга аныыллар

Хайа баҕарар нэһилиэккэ бэйэтин тула дьону мунньан, уопсастыбаннай үлэни күөдьүтэр дьон бааллар. Кэбээйи нэһилиэгэр маннык киһинэн «Үтүө түгэн» түмсүү салайааччыта Татьяна Максимова-Лазарева буолар.

“2021 сыл ахсынньы 1 күнүгэр үрүҥ көмүс волонтердары түмэр «Эйгэ» уопсастыбаннай тэрилтэҕэ 8 буоламмыт, «Үтүө түгэн» түмсүү диэн ааттанан киирбиппит. Валентина Васильева салайыытынан икки сыл үрүҥ көмүс волонтердарга үлэлэспиппит, — диэн кини хайдах саҕалаабыттарын кэпсиир. — Бастакы үтүө дьыалабытынан «Саҥа дьыл кэһиитэ» диэн ааттаан ахсынньы 30 күнүгэр соҕотох олорор кырдьаҕастарбытыгар бородуукта нобуорун оҥорон бэлэхтээбиппит. Онтон «Үтүө санаа харыйата» аахсыйаҕа кыттаммыт күн сирин саҥа көрбүт уолчааҥҥа бэлэх оҥорон долгуппуппут. Ити бастакы үтүө дьыалалар этэ. Киһи үтүөнү оҥордоҕуна, чахчы кынаттанарга дылы буолар, өссө тэбиэһирэн үлэҥ күөстүү оргуйар.

Онтон барыбыт дууһатын, өйбүтүн-санаабытын аймаабыт байыаннай дьайыы саҕаланан, күүспүтүн-күдэхпитин кыайыыга анааммыт күн бүгүнүгэр диэри үлэлэһэ олоробут”, — диир кини.

“Үтүө түгэн” олохтоох түмэли киин оҥостон, түмэл кэлэктиибин кытта нэһилиэнньэҕэ ыҥырыы таһааран, сылаас таҥаһы хомуйбуттар. Бары көмөлөөн балачча улахан баһыылканы оҥорон олохтоох дьаһалтаҕа туттарбыттар. Итинтэн ыла байыаннай дьайыыга ас-таҥас, туттар тэрил хомуйуутугар, оҥоруутугар, тигиитигэр быыстала суох көмөлөһө олороллор.

“Билигин «Саха» НКИХ Москватааҕы филиалын салайааччыта Туйаара Константинова салайар «Сахаволонтер» түмсүүтүн кытта ситимнээхтик үлэлиибит, — диэн салгыы кэпсиир Татьяна Давыдовна. — Туйаара Николаевна бэйэтин тула үтүө санаалаах дьону түмэр, салайар ураты дьоҕурдаах. Ол түмүгэр 2024, 2025 сылларга үлэбит далааһына өссө кэҥээтэ. Госпитальга сытар буойуттарга аадырыстаах көмөлөрү интэриниэт ситимин нөҥүө үлэлиир маҕаһыыннартан сакаастаан оҥоробут, илиилэриттэн, атахтарыттан маппыт уолаттарга протезтарыгар чохуоллары, гиипсэлээх атахтарыгар следкилэри баайыынан дьарыктаммыппыт иккис кыһыммыт буолла”.

Түмсүү бэйэ иһигэр эрэ буһа сыппат, нэһилиэнньэни, өссө улуус нэһилиэктэрин кытта хабан, маастар-кылаастары ыыталлар, видеоҕа устан ыытан, оҥорторору оҥорторон, баайтарары баайтаран, тиктэрэри тиктэрэн киэҥ далааһыннаахтык үлэлииллэр. Ити эмиэ үлэлэрин биир ньымата буолар.

«Үтүө түгэн» түмсүү 2024, 2025 сс. «Доброволец Якутии» өрөспүүбүлүкэтээҕи бириэмийэҕэ «Волонтерский штаб года» анал аакка кыттан финалистаан кэлбит. Бу ситиһии элбэх үлэ түмүгэ буолар.

“Бу күннэргэ госпиталларга ыытарга анааммыт инвалиднай кэлээскилэргэ олбохтору тиктибит, — диир түмсүү салайааччыта. — Дьиэ-уот сылааһын санатаары, сахалыы тыыннаатыбыт. Мин бэйэм олус үөрэбин — маннык үлэһит, киэҥ көҕүстээх, аһыныгас дууһалаах, дойдуга бэриниилээх дьон баарыттан. Кинилэри холобур оҥостобун, сырдык сулуска холуубун, киэн туттабын!!!”

Кыайыы волонтердара

Саха сиригэр 4 тыһ. тахса Кыайыы волонтердара Кыайыы 80 сылынан патриотическай, кэриэстэбил уонна култуурунай-маассабай аахсыйалары тэрийиигэ, ыытыыга кыттаары сылдьаллар.

“2025 сыл саҕаланыаҕыттан Кыайыы үбүлүөйүгэр анаммыт хас да улахан тэрээһини тэрийэргэ уонна ыытарга көмөлөстүбүт. Ол курдук, Ленинград куораты блокадаттан толору босхолооһун күнүгэр волонтердар өрөспүүбүлүкэ атыы-эргиэн кииннэригэр “Блокада килиэбэ” Бүтүн Арассыыйатааҕы аахсыйаны, оттон оскуолаларга “Ленинград блокадата” Эр санаа уруоктарын ыыппыттара. Хамсааһын актыбыыстара Саха сиригэр Ийэ дойдуну көмүскээччи сылын, “Бастионы памяти” өрөспүүбүлүкэтээҕи историко-патриотическай бырайыак өрөгөйдөөх аһыллыыларыгар уонна Аҕа дойдуну көмүскээччи, Сталинградтааҕы кыргыһыыга немецкэй-фашистскай халабырдьыттары үлтүрүтүү Күнүгэр анаммыт тэрээһиннэргэ кыттыыны ылбыттара”, — диэн кэпсээтэ “Кыайыы волонтердара” Бүтүн Арассыыйатааҕы уопсастыбаннай хамсааһын Саха сиринээҕи салаатын Эрэгийиэннээҕи ыстаабын бэрэссэдээтэлэ Тимур Егоров.

Кини эппитинэн, Дьокуускайга муус устар ортотугар “Кыайыы волонтердара” хамсааһын өрөспүүбүлүкэтээҕи пуорума буолуоҕа. Пуорум Кыайыы 80 сылын көрсө волонтердар куорпустарын үөрэтии бүтэһик түһүмэҕинэн буолуоҕа.

“Муус устар 24 күнүгэр Бүтүн Арассыыйатааҕы “Георгиевскай лиэнтэ” аахсыйата саҕаланыаҕа, оттон муус устар 25 күнүгэр дойду бары эрэгийиэннэригэр “Кыайыы дьыктаана” Норуоттар икки ардыларынааҕы патриотическай аахсыйа ыытыллыаҕа. Кыайыы күнүн көрсө волонтердар “Олбуорунан ыллыыбыт” уонна “Бүтүн Арассыыйатааҕы субуотунньук” аахсыйаларга кыттан, өйдөбүнньүктэри уонна бойобуой албан аат мемориалларын көрүөхтэрэ-истиэхтэрэ», — диэн Тимур Егоров былаанын үллэһиннэ.

ХААРТЫСКАНЫ ТАТЬЯНА МАКСИМОВА-ЛАЗАРЕВА ТИКСЭРДЭ