«Сюрприз» үҥкүү ансаамбыла Соҕуруу Кэриэйэҕэ боруонса мэтээлгэ тигистэ

Саха сирин «Сюрприз» үҥкүү норуодунай ансаамбыла Соҕуруу Кэриэйэҕэ норуоттар икки ардыларынааҕы мааска бэстибээлгэ ситиһиилээхтик кытынна. Бу туһунан Өксөкүлээх Өлөксөй аатынан Норуоттар доҕордоһууларын дьиэтин пресс-сулууспата иһитиннэрэр.

Кэлэктиип балаҕан ыйын 26 күнүттэн алтынньы 5 күнүгэр диэри Андон куоракка ыытыллыбыт «ANDONG MASK DANCE FESTIVAL» ааттаах-суоллаах күрэххэ боруонса наҕарааданы уонна харчынан бирииһи ылла. Бэстибээлгэ аан дойду 30-ча дойдутуттан, ол иһигэр Кытайтан, Индияттан, Японияттан, Турцияттан уонна да атын дойдулартан үҥкүү кэлэктииптэрэ кытыннылар.

Бэстибээл аһыллыытын сиэрэ-туома параадынан саҕаланна. Тоҕус күн устата саха үҥкүүһүттэрэ куорат араас былаһааккаларыгар нуучча норуодунай бырагырааматын көрдөрдүлэр. Күрэх ирдэбилинэн хас биирдии дойду маасканы туһанан биир нүөмэри көрдөрүөхтээх этэ. «Сюрприз» ансаамбыл бу сорудаҕы ситиһиилээхтик толордо. Кэлэктииби үөрүүлээхтик көрсүһүү алтынньы 10 күнүгэр, бээтинсэҕэ, Дьокуускай аэропордугар ыытыллыаҕа.