Сыымах үөрэнээччилэрэ инкубатортан чоппуускалары таһаардылар

Сыымах сэлиэнньэтин Баатара оскуолатыгар быйыл муус устарга үөрэнээччилэр инкубатортан чоппуускалары таһаарар бырайыагы саҕалаабыттара. Маны көҕүлээччинэн Ил Дархан иһинэн үлэлиир Туруктаах сайдыы сэбиэтин чилиэнэ Людмила Николаева буолбута. Кини СӨ баһылыга Айсен Николаевтыын оскуола научнай-чинчийэр үлэтигэр уонна урбаанныыр сыалларыгар анаан үс инкубаторы бэлэхтээбиттэрэ. 

Бырайыагы олоххо киллэрэр туһуттан АГАТУ уонна Дьокуускайдааҕы көтөр фабриката кыттыспыттара. Онон бастакы баартыйа сымыыты птицефабрикаттан аҕалан, инкубаторга укпуттара. Мантан 125 чоппууска тахсыбыта.

Онтон ыам ыйын саҕаланыыта оскуола уонна Мэҥэ Хаҥалас улууһун дьаһалтата баһылык Дмитрий Тихоновы кытта 160 бройлер-чоппуусканы атыыласпыттар. 21 күнүнэн 110 чоппууска тахсыбыт. Үөрэнээччилэр мантан 80-ун нэһилиэнньэҕэ атыылаабыттар, 30-тун эспэримиэҥҥэ анаан хаалларбыттар. Бу бырайыагынан кинилэр дакылаат суруйуохтаахтар.