Сыымахха роботизированнай сүөһү иитэр комплексын тутуохтара

Мэҥэ Хаҥалас улууһун Сыымах сэлиэнньэтигэр роботизированнай сүөһү иитэр комплексын тутуохтара. Ил Дархан Айсен Николаев улууска оробуочай сырыытын кэмигэр комплекс бырайыагын кытары билистэ. 

“Саҥа олох” ХЭТ  оҥорбут роботизированнай сүөһү иитэр комплекса нэһилиэнньэни сибиэһэй бородууктанан хааччыйыаҕа уонна эбии үлэ миэстэтин таһаарыыга көмөлөһүөҕэ.

Быйыл кулун тутар ыйга “Саҥа олох” ХЭТ Вологодскайтан Голштинскай кыһыл эриэн боруо­да ынахтары аҕаларга дуогабарга илии баттаабыта. Улуус бу пиэрмэ туруохтаах сирин быһааран турар. Итиэннэ научнай-исследовательскай институты кытары бырайыак техническэй өттүн оҥорорго дуогабар баттаммыт. Билиҥҥитэ бырайыактыыр-симиэтэлиир докумуоннары бэлэмнииллэр.

Саҥа комплекс эһиил атырдьах ыйыгар үлэҕэ киириэхтээх. Манна сылга 1200 туонна үүт ыаныаҕа, 30 үлэ миэстэтэ тахсыаҕа.