Сыымахха Васильевтар үлэлэригэр атынан сылдьаллар

Бу күннэргэ Мэҥэ Хаҥалас улууһугар Сыымахха командировкаҕа сылдьан,  киһи кэрэхсиир түгэнин көрөн, сырдатарга сананным.

Васильевтар дьиэ кэргэн Сэбиэскэй Сойуус Дьоруойа  Ф.К. Попов аатынан Баатара орто оскуолатыгар үлэлииллэр. Ыал аҕа баһылыга Степан Иннокентьевич оскуолаҕа физкультура учууталынан уонна кадеттар интэринээттэригэр иитээччинэн үлэлиир.  Ыал ийэтэ Ньургустаана Дмитриевна — оскуола вахтера. Васильевтар сэттэ оҕолоохтор.

— Сарсыарда хотоммутугар үлэлиир уонна ыраах олорор буолан, үлэбитигэр хойутаабакка кэлэрбитигэр аппыт наһаа көмөлөөх. Үлэбит 8 чааска саҕаланар. Онон сарсыарда  7 чаас   30 мүн. хоҥнобут.  Аппыт таһырдьа турар буолан, гараас, оттук-уматык  наадата суох, — диэн кэпсиир Ньургустаана Дмитриевна.

«Кыһын кэлэн иһэн тоҥмоккут дуо?» диэн ыйыппыппар, «аппыт түргэн эрээри, сороҕор бытааран да ылар. Ол кини «настарынньатыттан» тутулуктаах. Чугас сылдьар буолан тоҥмоппут«, дииллэр элбэх оҕолоох ыал Васильевтар.

Ити курдук, тыа сирин дьоно саха атын көлүнэн, наадаларыгар кэлэ-бара  сылдьаллара көрүөххэ үчүгэйэ сүрдээх.  Өбүгэ көлөтө өрүү эрэллээх буоллаҕа.