«Сыыппара Алмааһа» федеральнай пуорум төрдүс төгүлүн ИТ-эспиэрдэри түмүөҕэ

Сэтинньи 27-29 күннэригэр Уһук Илиҥҥэ сыыппара технологияларын эйгэтигэр сүрүн тэрээһининэн Дьокуускайга IV «Сыыппара Алмаас» федеральнай пуорум ыытыллыаҕа. Бу федеральнай таһымнаах тэрээһиҥҥэ Саха сирэ дойду технологическай сайдыытын туһаайыыларыгар сөп түбэһэр 42 кэриҥэ сүрүн тиэмэни киллэрдэ.

Пуорум бырагыраамата киэҥ уонна дириҥ ис хоһоонноох буолуоҕа. Пленарнай сессияҕа РФ Бэрэсидьиэнэ Уһук Илин уонна Арктика сыыппара сайдыытыгар туруорбут соруктарын быһаарар ньымалары дьүүллэһиэхтэрэ. Ол иһигэр:  Уһук Илин уонна Арктика сирдэригэр сыыппара инфраструктуратын уонна спутник сибээһин олохтооһун;  интэриэт уонна сибээс хабар логистиканы сайыннарыы; пилота суох көтөр аппарааттарга анал зоналары тэрийии; үрдүкү технологиялаах оҥорон таһаарыыны өйөөһүн: роботтары киллэрии, оҥоһуу өй, киһи инженернэй уонна айар талаана. Ону таһынан, пуорум былаһааккатыгар «Арктика синергията — дойдуну сомоҕолооһун» диэн федеральнай бырайыак үлэҕэ киириэҕэ. Бу – Российскай Федерация сиригэр-уотугар телекоммуникация эйгэтигэр саамай бөдөҥ инфраструктурнай бырайыагынан буолар. Бырайыак Саха сирин ыраах,  уустук суоллаах нэһилиэктэригэр аныгы телекоммуникационнай инфраструктураны олохтуур сыаллаах-соруктаах. Кыттааччылар ИТ-индустрия иһинээҕи үлэтин-хамнаһын дьүүллэһиэхтэрэ. Ол курдук, Саха сирин иһигэр оҥоһуу өйү оҥорууну уонна киллэриини көҕүлүүр мэхэньииһимнэр күннээҕи боппуруостара ырытыллыахтара. Маны сэргэ, 40 кыраадыс тымныыга экстремальнай сүүрүү уонна ИТ-эйгэтигэр уонна атын хайысхаларга ыччакка анаммыт туспа күн былааннаналлар.