«Сыыппара алмааһа»: Кууруска үөрэнэн, оҕолору дьарыктыыбын…

Бу күннэргэ Саха сиригэр тэрээһиннээхтик буола турар “Сыыппара алмааһа” пуорумҥа үгүс киһи тоҕуоруспут.

Хаҥалас улууһун Мохсоҕоллоох орто оскуолатын технология уонна үлэ учуутала Гаврил Иванович Ребров санаатын маннык үллэһиннэ:

— Бу “Сыыппара алмааһа” пуорумҥа араас беспилотниктар биһиги эйгэбитигэр туох көмөлөөхтөрүн, ханна туттуохха сөбүн туһунан иһиттибит. Бэҕэһээ сиэссийэлэргэ көмө тиийбэт сиригэр туттуллар дроннар тустарынан кэпсээтилэр.  Чуолаан, таһаҕаһы тиэйэр дроннары. Сүрүннээн хотугу дойду нэһилиэктэригэр уонна суол суох кэмигэр беспилотниктар туох ордуктаахтарын, ханнык хампаанньалар дрону оҥороллорун туһунан иһиттибит. Санкт Петербург  киэнэ үчүгэй быһыылаах, биһиги усулуобуйабытыгар быдан табыгастаах курдук. Кинилэр киэнэ таһаҕаһы тиэйэр кыамталара уонна ырааҕы көтүүтэ биһиэхэ сөп түбэһэр. Биһиги саҥа оскуолабытыгар дроннары биэрбиттэрэ. Бэйэм анал кууруска үөрэнэн, оҕолору дьарыктыыбын. Интэриэһиргиир оҕолор бааллар. Бу эйгэҕэ интэриэһи тардарга талааннаах оҕолору булуохха наада дии саныыбын.