«Сыыппара алмааһа»: Оҥоһуу өйү судаарыстыба салайыытыгар туһаныахтара

Сэтинньи 28 күнүгэр Дьокуускайга «Сыыппара алмааһа» федеральнай пуорум сиэссийэтигэр Оҥоһуу өйү (ИИ) судаарыстыба салайыытыгар туһаныы кыахтарын дьүүллэстилэр. Саха Өрөспүүбүлүкэтин (Якутия) Бырабыыталыстыбатын Бэрэссэдээтэлин солбуйааччыта Ольга Балабкина кыттыылаах тэрээһиҥҥэ технологическай хампаанньалар эспиэрдэрэ уонна Саха сирин, Новосибирскай уобалас уонна Ямал-Ненецкэй автономнай уокурук былааһын бэрэстэбиитэллэрэ кытыннылар.

«Саха сиригэр Ил Дархан Айсен Николаев сорудаҕынан судаарыстыба салайыытын тиһигин саҥардыыга үлэ ыытыллар, ол иһигэр сыыппараны, Оҥоһуу өйү киллэриигэ. Үлэ биэс стратегическай хайысханан барар: пилотнай бырайыактарга апробациялааһын, бэйэ ИИ-инфраструктуратын уонна тыл моделларын сайыннарыы, каадыр кыаҕын бэлэмнээһин, бырасыастары автоматизациялыырга ИИ-агеннары оҥоруу уонна Оҥоһуу өй ыстаабын тэрийии», – диэтэ Ольга Балабкина.

СӨ Бырабыыталыстыбатын бэрэссэдээтэлин солбуйааччы ЗАГС Управлениетын сыыппара көмөлөһөөччүтэ, «Саина» чат-бот туһунан сиһилии кэпсээтэ.

«Саха сирин ЗАГС уорганнарыгар сыл аайы 80 тыһыынчаттан тахса киһи олоҕун холбуур. Биһиги үс сыллаах туруорсуулар дааннайдарыгар олоҕуран, ЗАГС уорганнарыгар туруорсуулары ырыттыбыт, билии баазатын оҥордубут, «Саинаны» киһи саҥатын өйдүүргэ, гражданнар туруорсууларын контекстын өйдөөн хааларга, ыйытыыларга хоруйдуурга үөрэттибит. Билигин биһиги «Саинабыт» гражданскай турук аахталарын суруйуу эйгэтигэр билиилээх уонна ЗАГС исписэлиистэрин таһымынан ортотунан сэттэ сөкүүндэ иһигэр консультация биэрэр. Сотору «Саина» уустук ирдэбил ыйытыылары таҥастыыр буолуоҕа уонна сахалыы саҥарыаҕа. Ону таһынан, кини мессенджердэргэ үлэлиир, сэтинньиттэн МАХ мессенджергэ үлэтин саҕалаата», – диэн вице-премьер бэлиэтээтэ.

оҥо

Ольга Балабкина Айсен Николаев сорудаҕынан Бырабыыталыстыба чилиэннэрэ бэйэлэрин сыыппара бырайыактарын ыыталларын бэлиэтээтэ. Ол курдук, кыыл-сүөл ахсаанын сабаҕалааһын, 112 быһылааннарын сабаҕалааһын, үөрэнээччилэр 9-с кылаас кэнниттэн баралларын сабаҕалааһын, бастакы наадалаах табаардарга сыана хамсааһынын сабаҕалааһын курдук бырайыактар номнуо олоххо киллэриллэн эрэллэр. Холобур, кыыл-сүөл ахсаанын сабаҕалааһын бырайыага аһылык оҥорон таһаарыытын ордук көдьүүстээхтик былаанныырга, ороскуоту уонна логистиканы аччатарга кыах биэриэ, оттон 112 тиһигинэн сайаапкалааччыларга эппиэтинэһи кэтэһэр кэми кылгатыа. Ольга Балабкина сыыппара технологиялара судаарыстыба салайыытын көдьүүһүн үрдэтэллэрин тоһоҕолоото. Оҥоһуу өй баазатыгар оҥоһуллубут сыыппара көмөлөһөөччүнү туһаныы судаарыстыбаннай сулууспалаахтар ноҕуруускаларын биллэрдик аччатар, улахан дааннайдары түргэнник уонна чопчутук таҥастыырга кыах биэрэр, кэми кэмчилиир уонна салайыы бырасыастарын уопсай көдьүүһүн уонна гражданнарга оҥоһуллар өҥөлөр хаачыстыбаларын үрдэтэр.

V федеральнай пуорум Дьокуускайга сэтинньи 27-29 күннэригэр ыытыллар. Пуорум сүрүн тиэмэтэ – Уһук Илини дойду приоритетын быһыытынан сайыннарыы. Сүрүн сыал – бастыҥ технологиялары атастаһыы уонна сыыппара инфраструктуратын сайыннарыы нөҥүө олох хаачыстыбатын үрдэтэргэ стратегическай быһаарыылары бииргэ оҥоруу.