«Сыыппара алмааһа» пуорумҥа 2000 тахса киһи кыттар

Бүгүн, сэтинньи 27 күнүгэр, Дьокуускайга Саха тыйаатырыгар «Сыыппара алмааһа» федеральнай пуорум үөрүүлээх аһыллыыта буолла.

Пуорум былаһааккатыгар сыыппара экэниэмикэтин лиидэрдэрин, ИТ-индустрия бастыҥ эспердэрин түмтэ. «Сыыппара алмааһа» пуорумҥа 70 эрэгийиэнтэн 250 ыалдьыт, 2000-тан тахса кыттааччы, ону тэҥэ Кытайтан, Индияттан, Казахстантан уонна Узбекистантан исписэлиистэр бааллара бэлиэтэнэр.

Пуорум үөрүүлээх аһыллыытыгар Саха Өрөспүүбүлүкэтин Бырабыыталыстыбатын Бэрэссэдээтэлэ Кирилл Бычков эҕэрдэлээн тыл эттэ. Кини федеральнай таһымнаах пуоруму ыытыыга өйөбүлүн иһин Арассыыйа сыыппара сайдыытыгар, сибээскэ уонна маассабай коммуникацияларга министиэристибэҕэ, пуорум бары партнердарыгар махтанна.

«Бу дьиҥнээх сыыппара уопсастыбаннаһын сийиэһэ буолар. Инники күөҥҥэ сылдьар сыыппара оҥорон таһаарааччыларын улахан түһүлгэтэ. Сыыппара технологията биһиги күннээҕи олохпутугар өтө анньан киирдэ. Биһиги үлэбитигэр уонна дьиэтээҕи үлэбитигэр хото киирэн эрэр. Биһиги сорукпут – олохпут өссө сайдарыгар сыыппара технологиятын туһаныы. «Сыыппара алмааһа» Саха сирин кытары сибээстээх көннөрү аат эрэ буолбатах диэн бэлиэттиэм этэ. Түөрт сыл анараа өттүгэр «Сыыппара алмааһа» пуоруму тэрийэрбитигэр алмаас диэн элбэх өрүттээх өйдөбүл диэн толкуйдаабыппыт. Алмаастаан бриллиант оҥорон, технологическай быһаарыылары олоххо киллэриэхтээхпит. Бу биһиги барыбыт сорукпут. Биһиги дойдубут сыыппара технологиятыгар инники күөҥҥэ сылдьар, араас саҥа олоххо киирэр. Саха сирэ эмиэ миэстэтигэр турбат, саҥа технологияларга инники хардыылыыр. Сыыппара экэниэмикэтигэр сөптөөх инфрастурктура тэриллэр, биһиги ИТ-кииммит, Технопаарка, о.д.а. Саха сиригэр оҥоһуллар бырайыактар бүгүҥҥү күҥҥэ дойдуга биллэллэр», — диэтэ Кирилл Бычков.

Пуорум ыалдьытынан РФ сыыппара сайдыытыгар, сибээскэ уонна маасабай коммуникацияҕа миниистирэ Максут Шадаев буолла. Кини пуорумҥа кыттыыта тэрээһин федеральнай суолталааҕын бэлиэтиир уонна Уһук Илин уонна Арктика цифровизациятын сүрүн боппуруостарын дьүүллэһэргэ, ону тэҥэ саҥа бырайыактары, көҕүлээһиннэри билиһиннэрэргэ кыахтары арыйар. Кини кылгастык пуорум кыттыылаахтарын эҕэрдэлээтэ.

«Мин Саха сиригэр иккис кэлиим. Саха сирэ ИТ эйгэтигэр биир инники күөҥҥэ сылдьар эрэгийиэн. Сыыппара сайдыыта, креативнай индустрия күүскэ барар. Бу курдук сайдан иһиҥ, биһиги бары өттүнэн өйүөхпүт. Пуорумҥа араас хайысха туһунан кэпсэтиэхпит, дьүүллэһиэхпит, көхтөөх кыттыыны ыларгытыгар ыҥырабын», — диэтэ кини.

Бу тэрээһиҥҥэ Саха сирэ дойду технологическай сайдыытын туһаайыыларыгар сөп түбэһэр 42 кэриҥэ сүрүн тиэмэни киллэрдэ.
Пуоруму үгэс быһыытынан Саха Өрөспүүбүлүкэтин Бырабыыталыстыбата, СӨ Инновацияҕа, сыыппара сайдыытыгар уонна инфокоммуникационнай технологияларга министиэристибэтэ, СӨ сайдыытын корпорацията, Сыыппара контенын сайыннарар пуонда, «Якутия» венчурнай хампаанньата, СӨ Инновациятын сайыннарар пуондата, Өрөспүүбүлүкэтээҕи инфокоммуникационнай технологиялар кииннэрэ, «Якутия» технопарк тэрийэллэр.

Салгыы аныгы үйэ ыччата сыыппара уонна киһи аймах алтыһыытын, сыыппара өйү туттан, ураты представление көрдөрдө.
Пленарнай мунньах тиэмэтэ – «Уһук Илин сыыппара сайдыыта – дойду приоритета», онно Арассыыйа Хотугулуу-Илиҥҥи өттүн сайдыытыгар сыыппараҕа киирии, сибээс уонна пилота суох авиация сайдыытын дьайыытын боппуруостарын ырытыстылар.

Сайаана Львова хаартыскаларга түһэриитэ