«Сыыппара алмааһа»: Саха сиригэр киинэ уонна ойуулук пуондата тэриллиэҕэ

Кэлэр сылга пуонда тэриллиэҕин туһунан «Сыыппара алмааһа» пуорумҥа СӨ Корпорациятын креативнай индустриялары сайыннарыыга дириэктэрэ Петр Гоголев иһитиннэрдэ.

Киинэ, ойуулук уонна геймдев, ИТ-эйгэ экспортер-хампаанньаларын бэрэстэбиитэллэрин кытта креативнай-экспортнай батлга позитивнай сонуну үллэһиннэ. Маннык көрүҥүнэн «Сыыппара алмаас» пуорумҥа бастакытын ыытыллар.

Исписэлиистэр булкаас хамаандалара дьиҥнээх саха табаардарын аан дойду ырыынактарыгар таһаарарга сыыппара концепцияларын оҥоруохтара, кросс-медийнай бырайыактары билиһиннэриэхтэрэ, онно олохтоох бородууксуйа киинэлэргэ, оонньууларга уонна сыыппара  көрүҥнэригэр киллэриллиэҕэ.

Батл түмүгүнэн экспортердар олоххо киириэн сөптөөх бастыҥ быһаарыылары ылыахтара. Экспортер быһыытынан түөрт хампаанньа кытынна:

• -«Якутский хлебокомбинат» — Саха сиригэр килиэп уонна кондитерскай бородууксуйаны оҥорон таһаарааччы;
• -«Производственнай комбинат №1» ХЭУо – арыгыта суох гаастаах уонна гааһа суох утахтары оҥорооччу;
• «Алмас» ХЭУо – Саха сиригэр пиломатериалы оҥорооччу;
• «Уруу» ХЭУо– Саха сиригэр саамай биллэр көмүһүнэн дьарыктанар брэнд.