Сыыппара хайысхатыгар сонун сүүрээн

Кэлиҥҥи кэмҥэ куйаар ситиминэн араас сыһыарыылары оҥорон, дьон олоҕун-дьаһаҕын чэпчэтии, билиитин көрүүтүн кэҥэтии үксээбитэ кэрэхсэбиллээх.

Икки сыллааҕыта «Саха­визион» IT-хампаанньа “Обра­щайся” диэн саҥа мобильнай сыһыарыыны оҥорон, судаарыстыбаннай уонна муниципальнай тэрилтэлэр үлэлэрин кэҥэтэргэ, дириҥ ис хоһооннуурга, олох-дьаһах кыһалҕаларын судургутутарга, урбаан салаатын көдьүүһүн үрдэтэргэ туһуламмыт үлэтэ киэҥ сэҥээриини ылла.

“Обращайся”  диэн нууччалыы өйдөбүлү сахалыы судургутук быһаардахха, “туһулаа­һын” диэн тылбаастанар – урбаан салаатын үлэһиттэригэр, былаас уорганнарыгар, дьоҥҥо-сэргэҕэ туһулааһыны биир сиргэ түмэр былаһаак­ка. Ким баҕалаах бу сыһыарыыга туспа ханаал, сирэй арыныаҕын сөп.

Бүгүн хаһыаппытыгар «Сахавизион» IT-хампаанньа салайааччыта, сыыппара саҥа көрүҥүн олоххо киллэрээччи, уопуттаах урбаанньыт Петр Бурцевы кытта тэрилтэ үлэтин сонун саҕахтарын туһунан кэпсэттибит.

Олохтоох дьаһалталары кытта үлэ

– Пётр Васильевич, эн олохтоох бэйэни салайыныы уорганнарыгар правовой өйөбүлү оҥорор исписэ­лиис быһыытынан бэрт ситиһиилээхтик үлэлээбиккин өйдүүбүн. Билигин бу саҥа  «Обращайся» диэн сыһыарыы тэрийээччитин уонна көҕүлээччитин быһыытынан үлэлиигин. Бу туһунан билиһиннэрэриҥ буоллар.

– 11 сыл устата олох­тоох салайыныы уорганнарыгар, чуолаан нэһилиэк дьаһалталарыгар ыстаакка юристара суох буолан, СӨ олох­тоох салайаныы уорганнарыгар –  улуус­тары уонна нэһилиэк­тэри кытта өйөбүл ааҕыныс­тыбатын иһинэн аутсорсинг быһыытынан араас юридичес­кай боппуруостарга өйөбүлү оҥорбутум. Олохтоох бэйэни сала­йыныы уорганнара бэйэлэрин тустаах саайтарын оҥорон,  ону толорон иһэр ирдэбил турбута. Ол иһин бу эйгэни анаан сирийэн үөрэтэн барбыппыт. “Обращайся” сыыппара көрүҥүнэн информацион­най эйгэни оҥоруу идиэйэтэ олохтоох былаас уорганнарын кытта үлэлиир кэмтэн саҕыллыбыта диэххэ сөп. Онон мобильнай сыһыарыыбыт нэһилиэктэри, улуустары кытта үлэбит түмүгэ. Сыһыарыынан ким баҕа­лаах туттар –  борос­туой дьонтон саҕалаан, биисинэс бэрэс­тэбиитэллэрэ, бырабыыталыс­тыба үлэһиттэрэ туһаныахтарын сөп. 2022 с. балаҕан ыйыгар “Обращайся” мобильнай сыһыарыы Арассыыйа үрдүнэн AppStore платформаҕа ТОП-35 бастыҥ сыһыарыы ахсааныгар киирбитэ.

Туһалаах сыһыарыы

–  Биллэн турар, кэккэ сонун сыһыарыы ур­­баан эйгэтигэр үлэлиир дьон болҕомтотун өрүү тардар. Урбаанньыкка туһаайан, тугу быһаарыаҥ этэй?

–  Урбаанньыттарга бу саамай туһалаах сыһыарыы. Маныаха хас да хайысха үлэ­лиир усулуобуйатын тэрийдибит – кэмиэрчэскэй этиит­тэн саҕалаан, атыы-эр­гиэн иһитиннэриитигэр тиийэ. Бу былаһаак­каҕа урбаанньыт бэйэ­тин ханаалын да арыйыан сөп. Урбаанньыттарга сыһыаннаах кэккэ холобурдары аҕалыым. Холобура, оскуолаҕа принтер наада буолбут. Оскуола дириэктэрэ биллэрии ыытар, сотору кэминэн киниэхэ хас да этии кэлэр. Салайааччы онтон бэйэтэ талан ылан сакаастыыр кыахтанар. Эбэтэр урбаанньыт дьоҕус биисинэстээх, чэ, кафелаах буоллун. Кини биһиги сыһыарыыбыт нөҥүө бэйэ­тин килийиэннэрин булуон сөп. Баҕар, урууну тэрийиигэ ыҥырдын, үбүлүөйдэри тэрийдин, араас тэрээһиннэри ыыттын. Кини ханаалыгар ким баҕалаах суруттарар. Ити курдук, уус урбаанньыт да атыытын, оҥоһугун дьон дьүүлүгэр таһааран, ким интэриэһиргээбит, тута урбаанньыкка тахсыан сөп.

Сыһыарыынан туһанааччылар ахсааннара элбээтэ, онуоха биисинэс эйгэтин үлэһиттэрэ бэрт көхтөөхтөрүн бэлиэ­тиир тоҕоос­тоох. Туһанааччылар кэккэлэригэр “Полярные авиа­линии”, “Газпромбанк”, «Туймаада Нефть» курдук бөдөҥ тэрил­тэлэр, «Азбука» канцелярскай табаар ситимэ, «Көмүлүөк» курдук улахан тэрилтэлэр бааллар.

Бренд хайысха

–  Кэккэ социальнай ситимнэр бобуллан турар кэмнэригэр бу сыһыарыы үгүс эйгэҕэ да, араҥаҕа да туһалаах буолсу.

– Нууччалыы эттэххэ, “импор­то­замещение” диэн өйдөбүлгэ Арассыыйа бырагырааматынан таҥыллыбытын туоһулуур үлэнэн дьарыктанабыт. Код, табаарынай бэлиэ –  барыта тустаах регистрацияны Саха сиригэр сокуонунан ааспыттара.

Хамаанда соруга күннэтэ кэҥээн иһэр. Икки-үс сыл устата айан таһаарыыга олорбут буоллахпытына, билигин сайдыы саҕахтарыгар киирдибит. Уһук Илиҥҥэ тахсар былаам­мыт туолан эрэриттэн үөрэбит. Ол курдук, Бурятияҕа, Новосибирскайга, Москваҕа тиийэ тэнийэн эрэбит. РФ Бэрэсидьиэнэ Владимир Путин бэйэтин туһаайыытыгар дойду урбаанньыттарын “бренд буолар хайысхалар саҥа көрүҥнэрин, сүүрээннэрин олоххо киллэриҥ” диэн анал ыҥырыытын биһиги толордубут диэхпин сөп. Онон саха урбаанньыттара оҥорбут “Обращайся” сыһыарыыбыт “Саха сиригэр оҥоһулунна” бренд биир ситиһиитинэн буолар. Икки сыл үлэлээн, маннык сыыппара көрүҥү – ураты сыһыарыыны дойду үрдүнэн бастаан сахалар таһаар­дыбыт. Саха сирин бородууксуйата, өҥөтө атын эрэгийиэннэргэ, тас дойдуларга бэйэтин биллэриэхтээх. Онон тас ырыынагы кытта ылар кыахтанныбыт.

Сонун бырайыак

–  Сонун бырайыакта­рынан дьону тардыы – бу сайдыы туоһута. Үлэҕитигэр туох чопчу былааннардааххытый?

–  Бу күннэргэ “Марафон-Продвижение” диэн тэрээһини оҥороору бэлэмнэнэбит. Бүгүҥҥү күҥҥэ 20-тэн тахса сайаапка киирдэ. Бу “Обращайся” сыһыарыыга биирдиилээн дьон арыммыт “страницалара”. Хас биирдии куолас – 3 солкуобай. Ол эбэтэр эн ханаалгар 5 тыһыынча киһи киирэн куоластаабыт буоллаҕына, 15 тыһыынча солкуобайы ылаҕын. Ити курдук бастаабыт киһи 100 тыһыынча солкуобайга тиэрдэн, бу бирии­һин уу харчынан ылар. Ол эбэтэр төһөнөн элбэх куолаһы хомуйар да, онто харчы буолан киниэхэ эргиллэр. Куонкурус сэтинньи 29 күнүгэр түмүктэнэр.