Сыыппара пуорумугар — Кытай устудьуоннара

Бу чааска «Үлэ кыбартаала» урбаан креативнай кластер киинигэр «Цифровой алмаз» федеральнай таһымнаах пуорум буола турар.

Тэрийээччилэр дойду 70 эрэгийиэниттэн икки тыһыынчаттан тахса кыттааччы кэлэрин былааннаабыттара. Ол иһигэр Кытайтан, Индияттан, Казахстантан уонна Узбекистантан кэлбит ыалдьыттар бааллар.

Ил Дархан Айсен Николаев пуорум аһыллыытыгар 2600 кыттааччы бэлиэтэммититтэн 300 киһи Арассыыйа атын эрэгийиэннэриттэн кэлбиттэрин иһитиннэрдэ.
Кырдьык, тэрээһиҥҥэ кыттааччы да, интэриэһиргээн кэлээччи да үгүс. Бэл, баараҕай бэйэлээх «Үлэ кыбартаала» кластер олох кыараан хаалбыт курдук буолбут. Мин аттыбар турар кыргыттары көрөн, кинилэрдиин кэпсэтэргэ сананным.

Ван Цикунь уонна Ван Синьюй ХИФУ устудьуоннара эбит.
Кыргыттар Кытай Щаньдун провинцияттан сылдьаллар. Кинилэр сэттиэ буолан «Управление человеческими ресурсами» магистерскай бырагыраама чэрчитинэн быйылгы үөрэх дьылыгар Кытайтан биир сылга үөрэнэ кэлбиттэр.

— Кууруспутугар 24 киһи үөрэнэр. Манна нуучча тылыгар анаан үөрэнэ сылдьабыт. Дойдубутугар экэниэмикэни сайыннарыыга сонун сүүрээннэри киллэрэр баҕалаахпыт. Онон аан дойду таһымыгар тахсарга, биллэн турар, нуучча тылын билэр олус наада, — диэн санаатын үллэһиннэ 22 саастаах эдэр экэнэмиис Ван Синьюй.

Кыргыттар Арктическай институт устудьуоннара саха таҥаһын муодатын көрдөрөллөр үһү диэн истибиттэр. «Пуорум бары тэрээһиннэрин көрөр баҕабыт улахан. Саха сирин олус кэрэхсээтибит», — диэн анаан бэлиэтээтилэр.

Елена Потоцкая.

Ааптар хаартыскаҕа түһэриитэ