Сыыппараҕа үлэни сүрүннүүр ыстаап тэриллиэҕэ

Бүгүҥҥү күҥҥэ Саха сирэ цифровой трансформация эйгэтигэр дойду эрэгийиэннэрин ортотугар 17-с миэстэҕэ сылдьар.  

Бу маннык ситиһии — 13 көрдөрүүгэ инники күөҥҥэ тахсыы түмүгэ. Ил Дархан туруорбут соруга — аны 7-с рейтиҥҥэ тахсыы. Бу туһунан сыыппара трансформациятыгар экэниэмикэ, социальнай эйгэ уонна судаарыстыбаннай салайыы управление бырайыактыыр офиһыгар буолбут мунньахха дьүүллэстилэр.

СӨ Ил Дарханын уонна Бырабыыталыстыбатын пресс-сулууспата иһитиннэрбитинэн, мунньахха Бырабыыталыстыба Бэрэссэдээтэлин солбуйааччы Анатолий Семенов улуустар муниципальнай тэриллиилэрин уонна куораттар уокуруктарын цифровой трансформацияҕа салайааччыларын рейтиннэрин оҥоруу соруга турарын эттэ. Бу, биллэн турар, миэстэтигэр ыытыллар үлэ көдьүүһүн быһаарыыга, анаарыыга улахан өйөбүлуү аҕалыаҕа. Суолталаах социальнай өҥөлөр электроннай көрүҥҥэ көһүөхтэрэ, гражданнары кытта быһа сибээс көдьүүстээхтик үлэлиэҕэ.

«Биһигини үгүс уларыйыы күүтэр. Саҥа бырайыактары олоххо киллэрэргэ Саха сирэ цифровой трансформацияҕа инники күөҥҥэ сылдьарын ситиһиэхтээхпит. Ол инниттэн бу салааны сүрүннүүр анал ыстаап тэриллэн, былааннах үлэни ыытар наада», – диэн бэлиэтээтэ Айсен Николаев.