Сыырдаахха Анатолий Копырин сип-панель оҥорор
![](https://sakha-sire.ru/wp-content/uploads/2024/06/sif.jpg)
Бэйэ дьыалатын тэринэр дьон социальнай хантараагы түһэрсэллэригэр субсидиянан үп-харчы ылар бырагыраамаларын Саха сирин олохтоохторо хото туһаналлар.
Уус Алдан Бэрт Ууһун нэһилиэгин Сыырдаах бөһүөлэгин олохтооҕо Анатолий Копырин тутууга киэҥник туһаныллар сип-панель матырыйаалы оҥорон таһаарар буолла.
Кини Мүрүтээҕи уолаттар гимназияларын 2013 сыллааҕы выпускнига, ХИФУ инженернэй-техническэй институтугар тутуу инженерин идэтин ылбыта. Анатолий сип-панель оҥорорунан дьарыктаныахпын сөп эбит диэн былааннаан, бастаан социальнай хантараак бырагырааматыгар кыттан, 350 000 солк. суума субсидия ылбыт, ону таһынан улуустааҕы Дьарыктаах буолуу кииниттэн 150 000 солк. көмө харчы ылан, 1,5 сылынан баҕарбыт санаатын олоххо киллэрдэ.
![](https://sakha-sire.ru/wp-content/uploads/2024/06/0b339d34-fca9-4239-b05f-1788e2258dbb.jpg)
![](https://sakha-sire.ru/wp-content/uploads/2024/06/8519799e-efe4-4b2c-aebb-496b03804b53.jpg)
![](https://sakha-sire.ru/wp-content/uploads/2024/06/4400c83c-4b4b-41f5-8bde-cacdc1b09745.jpg)
![](https://sakha-sire.ru/wp-content/uploads/2024/06/74bb6689-472a-457f-955b-2d4eefae14ee.jpg)
– Саҥа үлэлээммин, сакаастары ылан эрэбин. Бүгүн бастакы сакааспын оҥордум. Матырыйаалым Аллараа Бэстээх сыанатын кытта тэҥ, кыранан чэпчэки да диэххэ сөп. Күҥҥэ 64-144 устууканы оҥорон таһаарабын. Биир дойдулаахтарым бэйэ оҥоһуутунан туһанан араас тутуулары тутталларын баҕарабын. Тутууга эмиэ сакаас ылабын, – диэн эдэр урбаанньыт үөрүүтүн үөрэ-көтө үллэстэр.
Социальнай хантараак төлөбүрүн кээмэйэ сыалыттан тутулуктаах. Ол курдук, бэйэ дьыалатын арыныыга 350 тыһыынча солкуобай, оттон көмө хаһаайыстыбаҕа – 200 тыһыынча солкуобайы ылыахха сөп. Социальнай хантараагы түһэрсэргэ эрэгийиэннээҕи социальнай харалта уорганнарыгар биитэр Элбэх өҥөнү оҥорор Кииҥҥэ тиийиэххэ сөп. Ону сэргэ социальнай хантараакка «Госуслуги» портал нөҥүө сайаапка ыытыахха сөп.
Мария Аргунова
Сообщить об опечатке
Текст, который будет отправлен нашим редакторам: