«Сыыртан сырылыыр бэртээхэй!»

Бүгүҥҥүттэн Дьокуускайга 202-с түөлбэҕэ өрүс боротуохатыгар баар Хаар-муус паарка үлэтин саҕалаата. 

Саҥа аһыллыбыт буолан, киһи аҕыйах. Биир уолчаан үөрэ-көтө сыыртан сырылыы сылдьарын көрсөн, ыйыталастыбыт. Давид манна төрөппүттэрин кытта кэлбит. «Бүгүн Хаар-муус паарка аһыллар үһү» диэн ийэтэ эппит, ону көтүппэтэхтэр.

— Мин улахан сыыртан соҕотоҕун сырылаатым. Наһаа-наһаа түргэн этэ, сирэйбэр хаар ыһыллыбыта. Өссө хороон курдук муус сыыр баар, онтон сырылаатым. Муустан эриэн үөнү оҥорбуттарын көрдүм. Манна сылдьарбын олус сөбүлүүбүн, наһаа үчүгэй! Былырыын эмиэ дьиэ кэргэнинэн куруук сылдьар этибит, — диэн уолчаан кэпсээтэ.

Санатар буоллахха, саамай улахан сыыр 200 миэтэрэ уһуннаах. Киэһэ уота-күөһэ дьиримнээн, сырылыырга бэртээхэй буолар.

Оттон Афанасий Анисимов былырыын саас манна эмиэ инструкторынан үлэлээбит. Хараабыл курдук быһыылаах кыра сыырга үлэлиир.

— Оҕолору сыыртан түһэллэрин көрөбүн, көмөлөһөбүн, быһаарабын. Куттала суох буолууну хааччыйабын. Бу кыра сыырдар оҕолорго аналлаахтар. Сарсыарда 9 чаастан киэһэ 11 чааска диэри үлэлиибит. Күнү быһа турбаппыт, симиэнэнэн уларытыһа сылдьабыт. Сибиэһэй салгыҥҥа үлэлиир үчүгэй. Тоҥнохпутуна, киирэн иттэбит, ол эрээри киһи халыҥнык таҥыннаҕына, тоҥмот, — диэн кини кэпсээтэ.

Мантан саас халлаан  сылыйан, күн уһаан, киһи эрэ таһырдьа көй салгыҥҥа тахсан оонньуон, сыыртан сырылыан, хаҥкылаан дайыан баҕарар. Онуоха Хаар-Муус паарка аана аһаҕас. Билиэт сыаната улахан дьоҥҥо — 600 солкуобай, оҕолорго — 400 солкуобай, кыра оҕолор босхо сылдьаллар. Паарка сарсыарда 11 чаастан киэһэ 11 чааска диэри үлэлиир.

Бүгүн киэһэ 8 чаастан паарка аһыллыытыгар салют ытыахтара.