Сүүрүк Балбаара 80 сааһыгар кросс тэрийдэ

Аан дойду, Европа сүүрүүгэ хас да төгүллээх чөмпүйүөнэ, Россия спордун маастара Варвара Григорьевна  Макарова — Сүүрүк Балбаара 80 сааһын туолар өрөгөйдөөх үбүлүөйүн көрсө Дьокуускай куоракка бэтэрээннэр ортолоругар «Сүүрүү үөрүүлээх күнэ» кросс-сүүрүү күрэҕин ыытта.

Тэрээһин үөрүүлээх аһыллыытыгар СӨ физическэй култуураҕа уонна успуорка  миниистирин 1-кы солбуйааччыта  Александр Николаевич Бугаев Варвара Григорьевнаҕа «Маассабай успуорду уонна чөл олоҕу тарҕатыыга үтүөлэрин иһин» уонна ГТО кыһыл көмүс мэтээлин үөрүүлээх быһыыга-майгыга туттарда,

Сүүрүк Балбаара чөл олох пропагандиһа, Саха Өрөспүүбүлүкэтигэр успуорт сайдыытыгар сүҥкэн үтүөтүн-өҥөтүн, туйах хатарааччы, кыахтаах сүүрүк Полина Усмановна диэн кыыстааҕын сөҕөн-махтайан кэпсээтэ. Итиэннэ  үбүлүөйүн атын дьон курдук аймахтарын ортотугар көннөрү рестораҥҥа эрэ бэлиэтээн кэбиспэтэҕин, чөл олоҕу, успуорду тарҕатан, өрө тутан маннык күрэҕи ыытарын хайдахтаах курдук сөҕөрүн, холобур оҥосторун киэн тутта иһитиннэрдэ. Маны таһынан, «Сунтаар улууһа» МТ баһылыга Анатолий Васильевич  Григорьев «Үлэҕэ килбиэнин иһин» уонна «Бочуоттаах бэтэрээн» бэлиэлэри туттарда. Сүүрүк Балбаара эдэрдии эрчимин, кыаҕын, туруоруммут сыалын-соругун ситиһэрин бэлиэтээн эттэ. Сүүрүк эр дьон 5 км, дьахталлар 2,5 км  сүүрэн, араас саастарынан күрэхтэһэн, мэтээллэринэн, харчынан наҕараадаланнылар, бириистээх миэстэҕэ тиксибэтэх да спортсмен илии тутуурдаах, өттүк харалаах, Варвара Григорьевнаттан анал бириистээх дьиэлээтэ. Мустубут дьон Сүүрүк Балбаара олоҕун сэһэнин, хайдахтаах булчутун, кусчутун, элбэх дьон сырдык тыынын быыһаабыт талааннаах эмчитин таһынан, үҥкүүлээн тэйэ сылдьар, куруук үөрүү-көтүү аргыстаах, үгүс атастардаах-доҕоттордоох, эрэллээх аймах-билэ дьонноох-сэргэлээх диэн астына, сэмээр үөрэн тарҕаспыттарыгар киһи саарбахтаабат.

Үөрүүлээх тэрээһини  Григорьевна чугас аймахтара  ииллэн-саҕалаан ыыттылар.

В. Г. Доргуева, үлэ, успуорт бэтэрээнэ:

— Сааскы күммүт  сарсыардаттан чаҕылыччы тыган, тыалбыт хаптайан, уоскуйан сүүрүктэргэ анаммыт күн буолбута дууһа  үөрүүтүн толору биэрэн, анаан-минээн сүүрүү бырааһынньыгар  өрөспүүбүлүкэ араас муннугуттан быстыбат уһун тыыннаахтарын, быһый атахтаахтарын «Туймаада» стадиоҥҥа түмтэ. Саастарынан араарыллан регистрация аастыбыт, дуоһуйа сүүрүҥ  диэн  усунуос да  көрүллүбэтэ. Аны дистанцияларгын түмүктээккин кытта, Варвара Григорьевна мэтириэтэ уруһуйдаах   кыһыл көмүс  мэтээллэри  туттартаан истилэр.

Егорова Н.Т., 
Кириллин Трофим Семенович аатынан Кутана сельскай модельнай библиотекатын сүрүн библиотекара