Сүүс бааллаахтары уонна призердары наҕараадалаатылар

Ил Дархан Айсен Николаев Биир кэлим судаарыстыбаннай уонна демонстрационнай эксээмэннэри 100 баалга туттаран, орто оскуоланы уонна анал үөрэх тэрилтэлэрин бүтэрбиттэргэ, физическай култуураҕа Бүтүн Арассыыйатааҕы олимпиада, «Азия оҕолоро» VIII оонньуулар призердарыгар 100 тыһыынча суумалаах сэртипикээттэри туттарда. Ил Дархан Махтал суруктарынан учууталлар эмиэ бэлиэтэннилэр.

«Үгүс үлэнэн, сыранан уонна дьулуурунан ылбыт ситиһиигитинэн киэн туттабыт. Эһиги кыайыыларгыт биһиги өрөспүүбүлүкэбит тыһыынчанан ахсааннаах оҕолоругар холобур буолуоҕар эрэнэбин. Эһиги ситиһиилэргит Саха сирэ Уһук Илиҥҥэ үөрэх биир инники иһэр киининэн буоларын өссө төгүл бигэргэтэллэр уонна биһиги саамай дьоһуннаах сорукпут -– өрөспүүбүлүкэ хас биирдии эдэр киһитигэр  бэйэтин арыйар кыах баар буолара уонна куруук сайда турара. Мин эһиги хас биирдиигитигэр бириэмийэни туттарартан үөрэбин -– бириэмийэни эһиги олоххутугар бастакы улахан ситиһиигитинэн төрөөбүт өрөспүүбүлүкэҕит билиниитин уонна өйөбүлүн курдук ылыныҥ», -– диэтэ Айсен Николаев.
Айсен Николаев биир ый анараа өттүгэр, бэс ыйын 18 күнүгэр Дьокуускайга Арассыыйа бэрэсидиэньэ Владимир Путин кэлэ сылдьыбытыгар болҕомтотун туһаайда.
«Мин биһиги өрөспүүбүлүкэбитигэр хайдахтаах курдук талааннаах оҕолор баалларын туһунан эппит тылларыгар эһиэхэ киэн тутта тириэрдиэхпин баҕарабын. Владимир Владимирович Саха сирэ, Уһук Илин барыта -– олохтоохтор талааннарын уонна эрчимнэрин күүһүнэн салгыы сайдыахтаах күүстээх, кыраһыабай, модун уонна кэскиллээх эрэгийиэн диэн эппитэ. Эһиги хас биирдиигит ханнык да идэни талбытын, инникитин ханна да үлэлээбитин иһин, төрөөбүт дойдугут патриота буоларгытыгар уонна инники сайдарыгар кыттаргытыгар эрэнэбин», -– диэн эрэгийиэн баһылыга бэлиэтээн эттэ.
Ил Дархан кыайыылаахтары иитэн таһаарбыт оскуолалар уонна кэллиэстэр кэлэктииптэригэр, билиигэ дьулуурдаах, дьоһуннаах уонна эппиэтинэстээх эдэр дьон  төрөппүттэригэр  махталын биллэрдэ.
Быйыл былырыыҥҥы биир кэлим эксээмэн көрдөрүүлэрэ тубустулар -– 6 биридимиэккэ 27 ыччат сүүс бааллаах. В.П.Ларионов аатынан физико-тиэхиньиичэскэй лиссиэйи бүтэрбит Дмитрий Алексеев профильнай математикаҕа уонна нуучча тылыгар икки муҥутуур көрдөрүүлээх.

Ил Дархан «Азия оҕолоро» оонньуулары төрүттээбит Михаил Ефимович Николаев аатынан «Кыайыыга дьулуурун иһин» бирииһи стендовай ытыы кыайыылааҕа Айна Кириллинаҕа үөрүүлээх сиэргэ-туомҥа туттарда. Бастакы бэрэсидьиэн М.Николаев  кубогын «Азия оҕолоро»  оонньуулар аан дойдутааҕы кэмитиэтэ олохтоото.

«Мин тириэньэрдэрбэр уонна чугас дьоммор өйөбүллэрин иһин улаханнык махтанабын. Биһиги ситиһиибит -– мин тириэньэрдэрим кыһамньылаах үлэлэрэ. Мин Дьокуускай куораттааҕы национальнай гимназия 8-с кылааһын бүтэрдим. Успуорт бу көрүҥүнэн дьарыктанарга былырыын мин бииргэ үөрэнэр уолум «Дохсуҥҥа» ыҥырбыта. Күүстээх утарсааччылар баар этилэр, түмүккэ Урал федеральнай уокуругуттан Мария Березинаны кытары киирсибитим. Инникитин олимпиада чөмпүйүөнэ буолуохпун баҕарабын», -– диэн Оонньуулар чөмпүйүөнкэлэрэ санаатын үллэһиннэ.
«Айна «Азия оҕолоро» оонньууларга бэйэтин үчүгэйдик көрдөрдө, кини күрэхтэһиилэргэ успуорт маастарыгар хандьытаат нуорматын толорбут соҕотох спортсмен. Биһиги бу күннэргэ Москваҕа «Лисья нора» базатыгар ыытыллар дойду ыччаттарын лигатыгар көтөбүт. Ол кэнниттэн 19 саастарыгар диэри Арассыыйа күрэхтэһиитигэр кыттыахпыт». -– диэн стендовай ытыыга Саха сирин сүүмэрдэммит хамаандатын ыстаарсай тириэньэрэ Аркадий Андреев иһитиннэрдэ.