Сүүс харахтаах дуобакка Бүтүн Арассыыйатааҕы күрэхтэһии

Олунньу 20-25 күннэригэр Дьокуускай куоракка РФ үтүөлээх тириэньэрэ Н.Н. Кычкин кэриэһигэр сүүс харахтаах дуобакка Бүтүн Арассыыйатааҕы күрэхтэһии ыытыллыа.

Саха сирин, үгэс курдук, өрөспүүбүлүкэ дуобатчыттара Матрена Ноговицына, Гаврил Колесов, Тунара Федорова, Андрей Федотов, Иван Токусаров, Николай Стручков, Сандаара Апросимова, Айсен Егоров уо. д. а. көмүскүөхтэрэ.

Күрэхтэһии икки дьиссипилиинэнэн барыаҕа – сүүс харахтаах дуобат уонна блиц көрүҥүнэн ыытыллыаҕа. Оонньуулар өрөспүүбүлүкэтээҕи Саахымат-дуобат киинигэр ыытыллыахтара. Ону таһынан тэрийээччилэр Саха Өрөспүүбүлүкэтин сүүмэрдэммит хамаандатын уонна турнир ыалдьыттарын хамаандаларын икки ардыларыгар күөн көрсүһүүнү ыытарга былаанныыллар диэн Физкултуура уонна маассабай успуорт салалтата иһитиннэрэр.

Кыайыылаахтар уонна призердар өйдөбүнньүк мэтээллэринэн, грамоталарынан уонна бириистэринэн наҕараадаланыахтара. Ону таһынан номинацияларынан анал бириистэр туттарыллыахтара.