Сүүс саастаах сэрии бэтэрээнэ быыбарга куоластаата

Аҕа дойду Улуу сэриитин кыттыылааҕа, успуорт бэтэрээнэ Наум Трифонович Слепцов РФ Бэрэсидьиэнин быыбарыгар дьиэттэн куоластаата. Бу туһунан Дьокуускай куорат уокуруктааҕы дьаһалтатын телеграм-ханаала иһитиннэрэр.

Бу кулун тутар ыйга Наум Трифонович 100 саастаах үбүлүөйүн бэлиэтээбитэ. Кини олоҕун устата биир даҕаны быыбары көтүппэтэх.

«Бүгүн мин дьиэбэр быыбардыыр учаастак үлэһиттэрэ кэлбиттэриттэн олус үөрдүм. Куоласпын убаастыыр хандьыдааппар биэрдим. Быыбарга биһиги дойдубут уонна өрөспүүбүлүкэбит сайдарын, Өлүөнэ күргэтэ тутулларын иһин куоластыыбыт», — диир ытык кырдьаҕас.