Тааһаҕардар биэс боппуруоһу туруорсаллар

Саха Өрөспүүбүлүкэтин Бырабыыталыстыбатын бэрэссэдээтэлин солбуйааччылаах Михаил Викторович Никифоров салайар бастакы бөлөҕө ситэриилээх былаас ааспыт 2022 сыллаах үлэтин түмүгүн Тааһаҕар нэһилиэгэр отчуоттаата.

Михаил Никифоров кылгас отчуотун кэнниттэн тута кэпсэтиигэ киирдилэр.
Тааһаҕар олохтооҕо Родион Осипов оттооһун, сири нүөлсүтүү, оту тиэйии-таһыы туһунан ыйыталаста. Николай Поскачин нэһилиэккэ успуорт саалата баар буолуон баҕарарын эттэ. Оскуола дириэктэрэ Капитон Львов Бырабыыталыстыба үлэтин биһириирин, нэһилиэккэ кэнники сылларга элбэх оҥоһуллубутун, ол иһигэр саҥа оскуола ааспыт сыл Саҥа дьыл иннинэ тутуллан киирбитинэн махталын биллэрдэ. Оскуола учуутала, оҕо уһуйаанын төрөппүттэрин салайааччыта Аида Нахова оҕо уһуйаана 80-с сылларга тутуллубут буолан, эргэрбитин, аныгы ыстандаарка эппиэттээбэтинэн, саҥаны туттарары көрдөстө.

Мунньах түмүгүнэн Тааһаҕар баһылыга Семен Самуилович Каратаев биэс боппуруоһу боротокуолга киллэрэргэ эттэ. Ол курдук, нэһилиэккэ нүөлсүтэр үлэни ыытыыны, оту тиэйии харчытын түргэтэтиини, саҥа успуорт саалатын, оҕо уһуйаанын туттарыы бппуруостарын уонна былырыын үүттээн сир анныттан таһаарбыт ууларыгар ыстаансыйа, носуос, фильтр наадатын эттэ.