Күөл үрдүнэн канаатынан хаампыт Үөһээ Бүлүү Далырын уола сөхтөрдө

Марфа уонна Сергей Расторгуевтар ааттарынан СӨ Судаарыстыбаннай цииркэтин артыыһа, хапсаҕайга успуорт маастара, СӨ култуурутын туйгуна  Владимир Степанов Дьокуускайга Таалай күөлүн канаатынан туорааһына үгүс көрөөччүнү түмтэ. 

Канаатынан хаамарга үөрүйэх артыыс күөлү холкутук  туораата. Кэрэхсэбиллээҕэ баар, «Азия оҕолоро» тэрээһиҥҥэ кыттыһан, Саха цииркэтэ бэртээхэй сонун тэрээһини толкуйдаан, куорат олохтоохторун уонна ыалдьыттарын бэркэ сэргэхситтэ.

Таатта улууһун Уус Таатта нэһилиэгин модельнай бибилэтиэкэтин сүрүннүүр бибилэтиэкэрэ Акулина Маркова санаатын маннык үллэһиннэ:

— Дьокуускайга кэлээри сылдьан, аҕыйах хонуктааҕыта «Таалай күөлү цииркэ артыыһа канаатынан туоруур үһү» диэн сураҕы истэн баран, куоракка тиийэ охсон көрөр баҕа баһаам этэ. Бүгүн анаан бара сырыттым. Санаабын ситэн, үөрүү бөҕөбүн. Дьүөгэбинээн Диана Варламовалыын пааркаҕа сырыттыбыт. Пааркаттан сатыы кэлэн иһэн көрдөххө, куораппыт киһи билбэт гына тупсубут, киэркэйбит.

Таалай күөлгэ чугаһаан баран соһуйдубут аҕай — дьэ, элбэх да киһи буолар эбит! Онон «Азия оҕолоро» спортивнай оонньуулар барыбытын сомоҕолуур күүстээх тэрээһининэн буолар. Цииркэ 30 сыллаах үбүлүөйүгэр  олус ураты киэһэни бэлэхтээбитигэр бу тэрилтэ дириэктэригэр Сергей Расторгуевка истиҥ махталбын тиэрдэбин! Олус дуоһуйдум, астынным, чэпчээтим. 

Кырдьык, биир эмэ тэрээһиҥҥэ бачча элбэх киһи түмсүбүтэ буолуо дуо? Дьон утары дьиэ кырыыһатыгар тиийэ тахсан тураллара.

Таалай күөлү оннук элбэх киһи төгүрүйэн турар буолан,чугастан көрөр миэстэ олох суоҕа…

Онон хастыы да эрээтинэн туран көрдүбүт. Аһаҕас халлаан анныгар бэртээхэй цирковой көстүү мустубут дьону барыбытын сэргэхситтэ уонна астыннарда.

Канаатынан хаамар киһини көрөн баран төннөрбүтүгэр, Киров уулуссата эмиэ бэрт элбэх дьонунан туолла.

Ити курдук, «МАМОНТенок» цииркэ бэстибээлин биир суолталаах тэрээһинэ устуоруйаҕа киирэн, өргө диэри кэпсэлгэ сылдьыаҕа.