Таас Боотур-Дьулустаан Ноговицын «Кус быһый — ат бөҕө» турнирга тэҥнээҕин булбата

Бүгүн, балаҕан ыйын 14 күнүгэр, Мэҥэ Хаҥалас улууһун Майа сэлиэнньэтигэр Аркадий Алексеев бирииһигэр «Кус быһый — ат бөҕө» диэн пятиборьеҕа өрөспүүбүлүкэтээҕи турнир ыытылынна. Кыайыылааҕынан Горнай Маҕараһыттан сылдьар быйылгы «Дыгын оонньууларын» чөмпүйүөнэ Дьулустаан Ноговицын буолла диэн «Спорт Якутии» таһаарыы иһитиннэрэр.

Турнирга эр бэртэрэ хапсаҕайга, мас тардыһыыга, сүүрүүгэ, үҥүүнү быраҕыыга уонна ыараханы өрө тардыыга күрэхтэстилэр.

Дьулустаан Ноговицын биэс көрүҥтэн үһүгэр бастаата, икки көрүҥҥэ иккис буолла. Онон кыайыылаах аатын эрэллээхтик сүгэн, сүрүн бириис — 500 тыһыынча солкуобай уу харчынан наҕараадаланна.

Иккис миэстэҕэ Ньурбаттан Владимир Федоров, үһүс миэстэҕэ Чурапчыттан Павел Друзьянов таҕыстылар.