Таас Уола-Сэмэн: «Сэриигэ атаарыы»

Куонкуруспут 29-с кыттааччыта Томпо  Кириэс Халдьаайытыттан  Константинов Семен Иванович — Таас Уола-Сэмэн:

Сэриигэ атаарыы

Аҕа барахсан уйулҕата хамсыыр,

Уола ытык иэһин төлүү айанныыр,

Иннигэр туох күүтэрэ биллибэт,

Өһүөннээх өстөөх сэриини тохтоппот.

Аҕа ииппитэ дойдутун таптыырга,

Аҕа көлүөнэ аатын ааттатарга,

Үтүөнү-кэрэни өрө тутарга,

Күөмчүлэммиккэ көмүскэл буоларга.

Арҕаа кырыктаах кыргыс хонуутугар,

Үөр өстөөхтөн дойду көмүскэлигэр,

Боотур ырыатын уолугар иҥэрэн,

Аҕа алгыстаан атаарар уолчаанын.

Кэскили түстээри төрүүллэр оҕолор,

Иэдээни бохсоору бараллар уолаттар,

Саха сэрииһит, эргиллээр этэҥҥэ,

Арчылыы сылдьыахтын аҕаҥ алгыһа!