Таатта аартыгар эр дьон субуотунньуктаатылар

Бу күннэргэ Таатта — Чурапчы улуустарын аартыгар эр дьон мустан субуотунньуктаатылар.

Бу туһунан  «Манчаары оонньууларын» дириэксийэтин пресс-киинэ маннык иһитиннэрдэ:

— Субуотунньугу «Манчаары оонньууларын» дириэксийэтин толорооччу дириэктэрэ Михаил Тарасов  салайда. Улуус дьаһалтатын, дьокутааттар,   «Техресурс» тэрилтэтин, улуустааҕы норуот айымньытын дьиэтин, социальнай харалта управлениетын, «Сарыал» успуорт киинин, Тыараһа нэһилиэгин эр дьоно  көхтөөхтүк кыттан, үлэ күөстүү оргуйда.

Тимир Аал Луук Маһы уонна Таатта улууһун гиэрбэтин тыараһалар ыһыахтыыр сирдэригэр «Арыылаахха» көһөрдүлэр. Муус устар саҥатыгар «Сельдорстрой» тэрилтэтэ арыы тыа оннугар таас, кумах кутуоҕа, тэҥниэҕэ. Маны таһынан, федеральнай трассаны көннөрүөхтэрэ. «Ректайм» тэрилтэтэ муус устарга ыраастанар сиргэ үлэтин түмүктүөхтээх. Аартыкка субуотунньуктар тиһигин быспакка ыытыллыахтара.