Таатта Баайаҕатын «Куула» түөлбэтигэр саҥа хочуолунайы тутууга анаан сиэр-туом толорулунна

Таатта улууһун Баайаҕа нэһилиэгэр 2012 сылтан кыбартаалынай  хочуолунай тутуллан, нэһилиэнньэ 75% киин ититии ситимигэр холбонон олорор.

Улуустааҕы дьаһалта пресс-сулууспата иһитиннэрбитинэн, үрэх нөҥүө олорор «Куула» түөлбэҕэ хочуолунай кыамтата тиийбэтинэн киин ситимҥэ холбонор  кыаҕа суох  этэ. Онон бу күннэргэ  56 ыал өр сылларга туруорсубут баҕа санаалара дьэ туолар буолла. Иннокентий Николаев салайааччылаах  «Альтернатива ОДЬКХ»  диэн чааһынай тэрилтэ хочуолунай тутуутугар ылсан, бу күһүн үлэҕэ киллэрэр былааннаах.

Онон сибээстээн олохтоохтор саҥа хочуолунай акылаатын түһэриигэ  анаан сирдэрин-уоттарын аһатан,  сахалыы сиэри-туому толордулар. Кинилэр  тутуу дьоһуннук ыытылларыгар,   олохтоохтор кэлэр кыһыны сылаастык көрсөллөрүгэр  үтүө алгыс тылларын анаатылар.  3,5 МВт кыамталаах хочуол тутуутун Баайаҕа уола Семен Мандаров   биригээдэтэ ылыста. 4,5 км. усталаах ититэр ситим турбата тардыллыаҕа.