Таатта дьоно-сэргэтэ успуорт саҥа эбийиэктэрин сэргиир, кэрэхсиир

Күрэс төрүт көрүҥнэригэр «Манчаары оонньууларын» көрсө Таатта улууһугар Ытык Күөлгэ саҥа эбийиэктэр тутуллан үлэҕэ киирбиттэрэ. Билигин манна олохтоохтор физкултууранан, успуордунан дьарыктаналлар. «Ньургун Боотур» стадиоҥҥа  уонна элбэх хайысханы толорор А.Е.Турнин аатынан успуорт уораҕайыгар сылдьар киһи элбээтэ.

—Ытык Күөл кэнники сылларга биллэ уларыйбытыттан үөрэбин:  саҥа лиссиэй, поликлиника, стадион, улахан успуорт дыбарыаһа баар буоллулар. Биэрэк үрдэ тупсарылынна. Бу барыта «Манчаары оонньууларын» кэнниттэн дьон-сэргэ дуоһуйа сынньанарыгар, чөл, чэгиэн олоххо тардыһыыта өссө күүһүрэригэр, успуордунан үлүһүйэн дьарыктанарыгар уонна Саха сирин, дойдутун араас күрэхтэһиилэргэ аатырдарыгар туһалыахтара, — диэн Ил Дархан Айсен Николаев бэлиэтээбитэ.

Ытык Күөл 1 №-дээх оскуолатыгар история уонна обществознание учууталынан үлэлиир Ньургун Ефремов, аныгы үйэ ирдэбилигэр эппиэттиир таһымнаах успуорт эбийиэктэригэр оҕолор, ыччаттар үөрэ-көтө дьарыктаналларын, улахан дьон дьиэ кэргэттэрин кытта бириэмэлэрин туһалаахтык атааралларын бэлиэтиир.

—Маннык уларыйыыларга табыгастаах, тупсаҕай усулуобуйа баар буоларын сэргэ, болҕомтону тардаллар. Успуорду сэҥээрээччи, сэргээн дьарыктанааччы да элбиир. Уһук Илиҥҥэ, физкултуураны сайыннарыыга кыһамньы баарыгар, болҕомто уурулларыгар махтал, — диэн этэр Ытык Күөл олохтооҕо.

—«Манчаары оонньууларын» көрсө тутуллубут эбийиэктэр биһиэхэ, ыччакка уонна нэһилиэнньэҕэ, успуордунан дьарыктанарга, ситиһиилэргэ дабайарга, чөл, чэгиэн олоҕу өйүүргэ кыаҕы биэрэллэр, тирэх буолаллар. Таатта олохтоохторо РФ Бэрэсидьиэнигэр В.Путиҥҥа ис сүрэхпититтэн махтанабыт, — диэн ХХ «Манчаары оонньууларын» кыттыылааҕа Сабрина Абрамова санаатын үллэстэр.

И.Г.Федосеев аатынан успуорт оскуолатын дириэктэрэ Егор Ноенохов этэринэн, элбэх хайысхалаах доруобуйаны чэбдигирдэр успуорт уомплексыгар успуорт оскуолата киирэр уонна каадырынан хааччыйыыга үлэ ыытыллар. Быйылгы үөрэх дьылыгар успуорт биэс көрүҥэр дьарыктыахтара. Ол курдук, баскетбол, мини-футбол, хабылык, хаамыска, гиирэ успуорда, уонна ити курдук салгыы уон көрүҥҥэ тиийиэ.

—Нэһилиэнньэни кытта үлэ эмиэ ыытыллар. Кэнники сылларга национальнай бырайыактар күүскэ үлэлииллэр, успуорт улахан эбийиэктэрэ тутуллан үлэҕэ киирэллэр. Дьон-сэргэ, ыччат физкултууранан, успуордунан көхтөөхтүк дьарыктанар буолла. Оҕолору кыраларыттан дьарыктыыр, умсугутар наада. Биһиги, тыа сирин дьоно-сэргэтэ, РФ Бэрэсидьиэнигэр В.Путиҥҥа, Ил Дархан Айсен Николаевка, Бырабыыталыстыбаҕа ис сүрэхпититтэн махтанабыт, — диэн этэр Егор Ноенохов.

«Ньургун Боотур» стадион ирдэбилгэ толору эппиэттиир. Сүрүҥҥэ футболлуур хонуу, сүүрэр ыллык, ыстанар сир, ону таһынан 1000 киһи көрөр стационарнай тырыбыната уонна 2000  миэстэлээх мобильнай сирдэр киирэллэр. Электроннай табло, факел эстакадата, сырдатар ситим бааллар. Эбии көмө сиригэр-уотугар малы-салы уурарга ыскылааттар, парковкалар, уо.д.а. бааллар.

Өрөспүүбүлүкэҕэ саамай улахан, бөдөҥ успуорт дыбарыаһыгар — элбэх хайысхалаах успуорт комплексыгар успуорт хас да көрүҥүнэн дьарыктаныахтарын сөп. Ол курдук манна, чэпчэки атлетиканы сэҥээрээччилэр сүрүөхтэрин, мини-футболу сэҥээрээччилэргэ, баскетболлааччыларга, волейболлааччыларга, теннистээччилэргэ, сыал ытааччыларга, аэробиканан дьарыктанааччыларга, шахматы, дуобаты сөбүлээччилэргэ усулуобуйа толору тэриллибит. Эбийиэк уопсай иэнэ 8 тыһ. кв. м. Аныгы тэриллэринэн толору хааччыллыбыт эбийиэккэ ким баҕарар сылдьыан сөп.

Бу эбийиэктэри таһынан, улуус киинигэр 100  миэстэлээх интэринээттээх, успуорт былаһааккалаах, 450 оҕо үөрэнэригэр оскуола тутуллубута. Ипподром саҥардыллыбыта, култуура уонна сынньалаҥ паарката тупсарыллыбыта.

Санатан эттэххэ, күрэс төрүт көрүҥнэригэр XXII «Манчаары оонньуулара» быйыл Таатта улууһугар Ытык Күөлгэ от ыйын 7-12 күннэригэр өрө көтөҕүллүүлээхтик, ураты сэргэхтик ыытыллыбыта. Бу далааһыннаах тэрээһиҥҥэ өрөспүүбүлүкэ улуустарыттан 1500 тахса күрэсчит кыттыбыта.

Сиһилии: https://www.sakha.gov.ru/news/10174

СӨ Ил Дарханын уонна Бырабыыталыстыбатын пресс-сулууспата

ЯСИА хаартыската