Таатта лиссиэйигэр үс хамаанданы олохтоотулар

Манчаары оонньууларын 22-с күрэһигэр Авксентий Мординов аатынан лиссиэйгэ үс  хамаанданы олохтоотулар.

Маны таһынан, үөрэх бу кыһатыгар сырдатар эйгэ үлэһиттэрэ түстүлэр.
«Манчаары оонньууларын ыалдьыттарын түһэрэргэ анаан эрдэттэн былааннаммыт таас, сырдык, киэҥ-куоҥ дьиэ быйыл тохсунньуга үлэҕэ киирбитэ. Лиссиэйбитигэр Дьокуускайтан 111, Амматтан — 98, Горнайтан — 86 күрэсчит кэлэн түстүлэр. Аһынан «Сэргэлээх» кэмбинээт хааччыйар. Онон оскуолабыт остолобуойа эрэстэрээн курдук буолла. Оскуолабыт аттыгар 1500 сибэкки олортубут.
Лиссиэй тиэргэнигэр оҕунан ытыы күрэһэ буолуоҕа. Өлүөхүмэлэр эрдэттэн кэлэн, таатталар 100 миэстэлээх интэринээппитигэр олорон бэлэмнэммиттэрэ.
Саҥа тутуллубут успуорт уораҕайа Улуу Кыайыы 80 сылын кытта ыкса сибээстээх. Ити успуорт комплекса турар сириттэн Ытык Күөл олохтоохторо Аҕа дойду Улуу сэриитигэр аттаналларыгар миитин буолбут. Саҥа уораҕайга ол бэлиэтинэн батас туруорбуттара. Ити сиргэ икки этээстээх оскуола турбута.
Онон Манчаары оонньууларыгар анаан саҥа тутуллубут саҥа уораҕайдар сыалларын-соруктарын толору ситистилэр», — диэн бэлиэтээтэ лиссиэй дириэктэрэ Изабелла Сивцева.