Таатта оҕолоро Докучаевскай оҕолоругар суруйаллар

Таатта улууһугар Комплекснай социальнай көмүскэл киинэ оҕолорго аналлаах сынньалаҥы тэрийэр былаһааккалара сайын устата үлэлииллэр.

Билигин лааҕырдар номнуо үһүс сезоннарын саҕалаатылар диэн Таатта улууһун дьаһалтатын пресс-сулууспата иһитиннэрэр. Иккис сезоҥҥа кырачааннар «Докучаевскай куорат оҕолоругар сурук» диэн аахсыйанан сурук суруйан ыыппыттара. Оҕолор суруктарыгар, Саха сирин туһунан кэпсээн, бэйэлэрин өйөбүллэрин көрдөрбүттэрэ.

Үһүс сезоҥҥа оҕолорго дойдумсах буолар өйү-санааны иитэр соруктаах аахсыйаны тэрийэн, Социальнай көмүскэл киинин кэллэктиибэ уонна анал байыаннай дьайыы кыттыылаахтарын дьиэ кэргэннэрэ уонна лааҕыр оҕолоро Докучаевскай куоракка олоророр оҕолорго анаан Саха сирин, Таатта улууһун туһунан кинигэлэри хомуйаннар «Аҕа дойдуну көмүскээччилэр» судаарыстыбаннай пуонда социальнай координаторыгар Агафья Ионоваҕа туттардылар.

Бэҕэһээ кырачаан патриоттар уонна кинилэр иитээччилэрэ Таатта улууһун баһылыгын бастакы солбуйааччытын Руслан Захаровтыын көрсөн бэйэлэрин туһунан кэпсээтилэр уонна улуус оскуолаларыгар, уһуйааннарыгар бу аахсыйа тарҕанарыгар баҕаралларын эттилэр.