«Таатта түмсүү» волейбол күрэхтэһиитигэр биир дойдулаахтарын түмтэ

Бу күннэргэ Дьокуускайга Таатта улууһуттан төрүттээх биир дойдулаахтары түмэр  “Таатта түмсүү” уопсастыбаннай тэрилтэ нэһилиэктэр спортсменнарын түмэн волейбол турнирын ыытта.

Тэрээһин туһунан “Таатта Түмсүү” чилиэнэ, волейбол турнирын тэрийээччитэ Семен Оготоев маннык сырдатта:

— Үгэс буолбут күрэхтэһии 2012 сылтан ыытыллар. Быйыл 9 нэһилиэк бэрэстэбиитэллэрэ 26 хамаанданы туруордулар. Уопсайа араас саастаах 208 волейболист кытынна. Таатта түмсүү кубогын суолтата сыл аайы үрдээн иһэрэ кэрэхсэбиллээх. Ордук эр дьон хамаандаларын ортотугар. Оонньооччулар ортолоругар өрөспүүбүлүкэ, улуус, куорат уонна ХИФУ сүүмэрдэммит хамаандаларын чилиэннэрэ бааллара — оонньуу ыытыллар таһыма үрдүгүн бэлиэтэ. Биир дойдулаахтарын биллиилээх тириэньэрдэр Семён Сабарайкин, Иван Турнин уонна Айсен Жерготов оонньуулара үөртэ.

 Күрэхтэһии кэмигэр улуус баһылыгын э.т. Р.И.Захаров, Дьокуускай куорат баһылыгын солбуйааччы, “Таатта түмсүү” уопсастыбаннай тэрилтэ бэрэссэдээтэлэ В.В. Аржаков, успуорт управлениетын салайааччыта А. Сидоров нэһилиэктэр бэрэстэбиитэллэрин уонна хамаанда оонньооччуларын кытта буолаары турар Манчаары Оонньууларыгар бэлэмнэнии уонна улуус спортсменнара Оонньууларга бэлэмнэниилэрин туһунан көрсөн  кэпсэттилэр, санаа атастастыбыт. “Таатта Түмсүү” уопсастыбаннай тэрилтэ кубогын турнира аһыллыытыгар түмсүү бэрэссэдээтэлэ Владимир Аржаков биир дойдулаахтарын бу сайын Манчаары оонньууларын ыытыыга социальнай-экэнэмиичэскэй сайдыы пуондатын өйүүргэ ыҥырда.

Икки күннээх тыҥааһыннаах күрэхтэһии түмүгүнэн эр дьон ортотугар Баайаҕа нэһилиэгин хамаандата кыайда. Финалга Чычымах нэһилиэгин уолаттарыгар хотторон, үһүс миэстэни Чөркөөх нэһилиэгин  бэрэстэбиитэллэрэ ыллылар. Кыргыттар ортолоругар кытаанах  киирсии кэнниттэн 1-кы миэстэни Туора-Күөл нэһилиэгин спортсменнара ыллылар. 2-с миэстэни Усть-Таатта нэһилиэгин кыргыттара, оттон 3-с миэстэни Дэбдиргэ спортсменнара ыллылар. Эр дьоҥҥо бэтэрээннэр ортолоругар Кыйы хамаандата тэҥнээҕин булбата.  2-с миэстэҕэ Чөркөөх нэһилиэгин эр дьоно таҕыстылар, оттон 3-с миэстэҕэ Харбалаах нэһилиэгиттэн төрүттээх дьон таҕыстылар. Бэтэрээн дьахталлар ортолоругар урукку «Коммунизм» сопхуос хамаандата кыайда, «Сайдыы» — 2-с, оттон урукку П. Алексеев аатынан сопхуос нэһилиэктэриттэн турар хамаанда дьахталлара 3-с буоллулар. Күрэхтэһии түмүгүнэн “Таатта Түмсүү” 2025 сыллааҕы кубогын Чөркөөх нэһилиэгин дьоно ылан үөрдүлэр-көттүлэр. Кыйы нэһилиэгин бэрэстэбиитэллэрэ 2-с, оттон Баайаҕа дьоно 3-с буоллулар. Таатта улууһуттан төрүттээх дьон буолаары турар Манчаары оонньууларын өйүүргэ быһаарынан, улуус бэрэстэбиитэлигэр 30 000 солк. туттардылар.

“Таатта түмсүү” уопсастыбаннай тэрилтэ волейболистара улуус муниципальнай оройуонун социальнай-экэнэмиичэскэй сайдыытыгар тэриллибит Көмө пуондатын үбүнэн өйүүргэ ыҥырдылар.