Таатта улууһугар биэс мэндиэмэннээх саҥа дьиэ үлэҕэ киирдэ

Таатта улууһугар «Жилье и городская среда» национальнай бырайыак чэрчитинэн, Ытык Күөлгэ хаарбах дьиэттэн көһөрүү бырагырааманан биэс мэндиэмэннээх саҥа дьиэ үлэҕэ киирдэ.

Ойуунускай аатынан уулуссаҕа 42 кыбартыыралаах, толору хааччыллыылаах дьиэни  Петр Архипов салайааччылаах «Томтор» тутуу тэрилтэтэ тутта.

Саҥа дьиэҕэ кыбартыыра күлүүһүн туппут түөрт оҕолоох Григорьевтар дьиэ кэргэн ийэлэрэ Алена Григорьева санаатын үллэһиннэ:

— Биһиги саҥа дьиэҕэ үс хостоох кыбартыыра күлүүһүн тутаммыт үөрүүбүт муҥура суох. Бу иннинэ 68 кв.м иэннээх дьиэҕэ олорбуппут, билигин онтон арыый улахан дьиэни биэрдилэр. Кыбартыырабыт киир да олор усулуобуйалаах. Онон билигин үөрүүлээх түбүктэр биһигини күүтэллэр. Түгэнинэн туһанан Ытык Күөл нэһилиэгин баһылыгар, дьиэбитин туппут тутуу тэрилтэтигэр махталбытын биллэрэбит.